Knuste døra med bil for å gjera innbrot
Joker Søfteland har blitt utsett for nok eit innbrot. I natt knuste nokon seg inn i butikken ved å køyra ein bil gjennom inngangsdøra.
Bildeserie:
Klokka 01.15 fekk politiet melding om at ein bil hadde køyrd gjennom inngangspartiet til Joker på Søfteland.
– Det er stole sigarettar. Patruljen leiter etter ein liten svart bil, meldte operasjonssentralen på Twitter.
Dette er ikkje første gangen nokon har tatt seg inn i butikken på Søfeland utanom ordinær opningstid. To gonger i 2012 tok tjuvar seg på spektakulært vis inn i butikken. I mars knuste dei seg gjennom veggen ved hjelp av spett og vinkelkuttar og fekk med seg varer for omlag 60 000 kroner.
I oktober same år skjedde det på nytt. Tjuvar slo seg gjennom veggen og inn i butikk-lokalet og fekk denne gongen med seg sigarettar for 140 000 kroner.
Også i 2014 blei same metode brukt for å koma seg inn i butikken og ta med seg sigaretter.
Skader på bilen
Ifølgje BT.no leiter politiet etter ein Ford Escort.
– Av omsyn til etterforskinga ønskjer vi ikkje å seia noko om biltypen på det noverande tidspunktet, seier politioverbetjent Audun Hadler-Olsen ved Os lensmannskontor.
– Det vi derimot ønskjer er at folk som har vore i området rundt det aktuelle tidspunktet kontaktar oss på telefon 56 30 39 00.
– Vi er interessert i alle tips, også frå dei som meiner dei ikkje har sett noko i området rundt Jokerbutikken klokka 0115 i natt.
Politiet er no på staden for å sikra spor.
– Eg har førebels ikkje oversikt over verdien av det dei har fått med seg, avsluttar Hadler-Olsen.
Fortvilt butikksjef
Butikksjef Petter Knudsen fortviler over innbrotet.
– Det er uvisst kva meir enn tobakk dei har fått med seg, men det største tapet blir nok uansett inngangsdøra dei har øydelagt, seier han til Midtsiden.
Vitne såg det heile
Eit vitne opplyser til BT at innbruddstjuvane rygga inn i butikken.
– Alarmen gjekk i ca fire minutt. Dei rygga inn i butikken og kom springande ut igjen.
Det skal ha vore to menn som deltok på innbrotet ifølgje vitnet.