Klatra to hakk på tabellen
– Vi burde avgjort dette tidlegare, men det var godt å ta dei to viktige poenga, seier 6-målsskårar Ove Lyssand.
Bildeserie:
Os fekk det unødig tøft mot eit skadeskote Eid, men hadde leiinga dei siste ti minutta og tok to viktige poeng i den jamne avdelinga som etter endt sesong skal senda dei fire svakaste ned til 4. divisjon.
– Det er viktig for oss å klara topp 6, seier Ove, som etter Jørgen Wold skåra mest i dag.
Os - Eid 23-21 (11-10)
Målskårarar: Jørgen Wold 7, Ove Lyssand 6, Trygve Lerch Dahl 3, Fredrik Andresen 3, Kasper Færøvik 2, Peder Lyssand og Nils Andris Hamre.
Laga følgte kvarandre og 7-9 blei til 11-10-leiing til pause. Os starta 2. omgangen best, etter redning av Einar Godø sørgja Ove og Trygve for å auka til 13-11.
Eid, som fekk éin mann skadd i første omgang, fekk den siste innbytaren sin utvist med direkte raudt 9 minutt ut i omgangen.
Men det blei både 14-15 og 17-17 før Os overtok.
– Eid var eit godt lag, men vi burde avgjort kampen før. Det blei mykje upresist i dag, men då vi fekk til spelet vårt var vi suverene, meiner Lyssand.
Debuterte ei veke etter 16-årsdagen
Ludvig Egge Drange, som fylte 16 år førre søndag, debuterte i dag for herrelaget.
– Det blei ikkje så mykje speletid, men det var gøy å vera på banen igjen, seier balltalentet, som også utmerker seg på fotballbanen for Os.
– Handballen har ikkje gutelag, så eg har spelt lite det siste året. Men eg byrja å trena med herrelaget i oktober og synest det var kjekt å få vera med i dag.
På 5. plass
Os klatra frå 7. til 5. plass og gjekk forbi motstandar Eid i dag.
Neste kamp går borte mot Sotra 2 på jumboplass, neste heimekamp går mot Bjørnar 2, som no har 7. plassen i avdelinga (der laga har spelt frå 7 til 12 kampar kvar), laurdag 23. januar.