Klarte ikkje å venta
Folk har vore på nesten trygg is to dagar på rad. I morgon blir isen trygg enkelte stadar, men nordenden av Ulvenvatnet har ikkje den tryggaste isen.
Politiet måtte fredag formiddag ta turen i Sigurdsvika for å be ungdommar som var på isen om å trekka på land att.
Frivillig ismålar John Lepsøy har også fredag vore ute og sjekka forholda.
– Nordenden av Ulvenvatnet er ikkje trygt. Der var det berre ein 5-6 cm nedanfor Ulven leir. Det er nok noko tryggare i Sigurdsvika, men der kjem eg til å la skiltet om at isen ikkje er trygg henga, seier Lepsøy.
13 cm tjukk stålis
To stader Lepsøy kjem til å henga opp skilt om at isen er trygg på laurdag er på Banktjørna og i sørenden av Ulvenvatet ved Moberg.
– Då eg målte dei plassane i dag var det 13 cm på begge vatna. Det tyder på at isen har vakse tre til fem cm i løpet av det siste døgret.
– På Ulvenvatnet må ein vera forsiktig om ein nærmar seg brua. Då eg gjekk opp der og nærma meg sivet i dag såg eg fort at isen var tynnare der. Før eg heng opp skiltet med at isen er trygg i morgon, så kjem eg òg til å markera med busker kor grensa går, forklarar Lepsøy.
Vêr varsom i områder kor bekkar renn inn og ut av vatna. Er det sirkulasjon i vatnet, så blir isen tynnare.