Klart for innspeling

Det har vore ein lang veg fram til at lydstudioet på Allakten no endeleg står ferdig og klart til bruk.

- Det er eit topp studio med mykje dyrt og avansert utstyr, fortel leiar i Os Rockeklubb Kjetil Grønvigh.

- Difor er det viktig at dei som skal bruke det har fått skikkeleg opplæring. Kurset i dag er eit basic grunnkurs i korleis systemet fungerar, kor vi har deltakarar frå både rockeklubben og ungdomsklubben med.

For ungdom, av ungdom

Initiativet til lydstudioet kom i si tid frå ungdomsklubben som og er medeigar i studioet. Os Rockeklubb har fått oppgava å administrera og drive studioet.

- Kommunen har vel såpass gode erfaringar med oss i høve til musikkbingene at dei ville ha oss med også når det kom til studioet, smilar Grønvigh.

- Studioet er primært for ungdom i Os, slår han fast.

- Her kan dei koma og spele inn låtar for ein slikk og ingenting.

Grønvigh påpeikar at dette ikkje er eit øvingslokale.

- Når ein skal booka studioet må ein vera ferdig med øvingane og ha låtane klare.

Også for bestefar

I tillegg til ungdommar i bygda håpar rockesjefen at også andre som vil spele inn ei låt eller ei plate finn vegen til studioet.

- Om bestefar vil spele inn juleplate til familien er han hjartleg velkomen.

- Han må nok rekna med å betala litt meir enn ungdommen, men alle inntektene kjem vi til å reinvestera i studioet for å gjera det enda betre, fortel Grønvigh.

BRAKstøtte

Kurset laurdag blei helden av Iver Sandøy, kjend trommeslager i Bergen med eiget lydstudio i Bergen.

- Vi er så heldige at BRAK har tatt kostnaden med heile kurset, fortel Grønvigh.

- Dei har nok lagt merke til det blomstrande musikkmiljøet vi har klart å få til på Os, noko som er utruleg kjekt for oss som driv på med dette.

BRAK er ein interesseorganisasjon og regionalt kompetansesenter for det rytmiske musikkmiljøet i Hordaland og Sogn og Fjordane.

Skeivt er bra

Byggeprosessen har vore lærerrik, men for bygningsmessige uerfarne rockarar var det mykje å tenke på.

- Det var ikkje berre enkelt. For ein gangs skuld var det eit poeng at veggar og vindauge ikkje blei satt rett inn, men at dei blei skråna litt slik at dei ikkje gav uønska lyd av vibrasjon.

- Også når det gjeld utstyret har det vore ein utruleg lærerik prosess kor vi har fått god hjelp av Andreas Lekven med å finna rett utstyr og gode prisar. Berre øyreklokkene kostar vel 4.000 kroner, fortel Grønvigh.

Finansieringa av studioet har kome i stand med ei fin blanding av offentlige midlar og sponsormidlar frå næringslivet i Os og Fusa.

Godt nok for Immortal

Espen Hjertaas er ein av dei sentrale frå rockeklubben som har vore med på oppbygginga av studioet. Som lydmann for Immortal burde Hjertaas vera rett mann til å uttala seg om kvaliteten på utstyret.

- Kunne Immortal nytta dette studioet til å spele inn plate?

- Ja, utstyret står ikkje tilbake for det. No har dei riktig nok nokre preferansar som gjer at det er lite trulig at det skjer, men reint teknisk er det ingenting i vegen for det, smilar Hjertaas.

Har alt

I følge Grønvigh har no Os alt dei treng i høve til musikk.

- Med dei to musikkbingane og rockeklubben for øving. Lydstudioet og videoprodusentane i Varde film & Media har vi no alt vi trenger for å halde fram med det skapande og kreative musikkmiljøet i bygda.

- Når vi i tillegg kan toppe det med Søfteland Rock 'n LoL og Oseana som spelestader er tilbodet komplett.

- Det einaste som manglar no er å få finansiert eit fast PA-anlegg i rockeklubben, avsluttar Grønvigh.