– Klarer ikkje å halda fristen

Anders Fagerthun, som eig huset Brugata 1, der Irish Cat held til, må levera søknad om bruksendring på lokalet etter at Matstova og kinarestauranten blei erstatta av nattklubb i desember 2010.

No meiner ein av naboane at fristen, som utgangspunktet var i utgangen av april blei ikkje halden. I slutten av april kom varsel om pålegg og tvangsmulkt med ny frist 30. mai.

Les òg: Varslar søknadsplikt

– Fristen er ute

Fagerthun har frist til 30. mai å levera ferdig søknad.

– Eg har fagpersonar som jobbar med saka. Så langt ser det OK ut, sa Fagerthun til Midtsiden.no fredag.

Han seier nabovarsel førebels ikkje er sendt, men at dette skal sendast når søknaden er klar.

Nabo Oshjørnet AS, representert ved eigedomsrådgjevar Terje Haugan, meiner Fagerthun ikkje kan klara å halda fristen.

– Problemet er at merknadane skal ligga i søknaden, og naboar skal ha to veker på seg til å svara på varselet. Det er i dag 18. mai og vi har ikkje fått varsel, derfor vil han ikkje klara det, sa Haugan til Midtsiden fredag.

Han viser til forskrift om byggesak paragraf 5-4 n opplysninger som skal gis ved søknad om tillatelse til tiltak, som seier søknaden blant anna skal innehalda dette:

"redegjørelse for nabovarsling og nabomerknader, samt kvittering for nabovarsel".

Ser på bygget som trygt

Når Irish Cat driv i eit lokale som er funnen søknadspliktig vil det seia at lokalet førebels ikkje er godkjent for bruk.

– Ser du det som problem at lokalet er i bruk? Er det fare for stenging om ikkje søknad kjem innan frist?

– Frå vår side ser vi på lokalet som trygt å bruka, så det skjer ikkje noko før søknad er behandla, seier kommunalsjef Karl Ole Midtbø.

– Eg ser at Midtbø, av ei eller anna årsak, legg opp til ei langdryg affære. Men når det kjem til skjenkesak spørs det om ikkje ting må vera på stell, seier Haugan.

– Vil neppe få nattklubbløyve

Haugan seier han tviler på at Irish Cat kan få lov til å driva vidare som nattklubb i Fagerthun-huset særleg lenge. Restaurant, pub og bar med stengetid klokka 23 er noko anna.

– 1. juni burde det bli stengt. Seinast 1. juli, når nytt skjenkeløyve skal vera på plass. Dei grunnleggande krava for skjenkeløyver er bruksløyve og plassering.

– Det viser seg jo med kravet om søknad, som kom så alt for seint, at Irish Cat i dag driv utan at det er bruksløyve på lokalet. Kor lenge skal det vera sånn og kven tør å gje nytt nattklubbløyve til eit lokale som ikkje er lov å bruka?

– Så blir det spennande å sjå korleis den politiske behandlinga går. Dei kan gje dispensasjon for mykje, men ikkje for alt, utan at dei har god grunn. Og det kan dei neppe ha i denne saka, sånn den står no.

På branninspeksjon

I tillegg til fristen 30. mai hadde Fagerthun frist til laurdag 19. mai med å koma med ekstern brannteknisk rapport på huset. Han har tidlegare hatt fleire fristar, blant anna 1. april og 30. april.

– Skansen Consult er sett på saka og dei kom med rapport til meg i dag. Den såg fin ut og konkluderte i grove trekk med at vi ikkje treng ombygging eller utviding av dører for å husa 170 gjestar.

– Eg reknar med at rapporten blir levert innan fristen i morgon, sa Fagerthun fredag.

Tysdag sa brannsjef Stein Gjøsund at rapporten var komen og at den såg grei ut.

– No vil vi på inspeksjon for å sjå at alle avvika og merknadane er tatt hand om, sånn det står i rapporten.

Gjøsund var måndag kveld og banka på døra i Brugata 1, men Irish Cat var stengt. Han vil gjera nytt forsøk onsdag kveld.

Bakgrunn:

Ein av naboane til Fagerthun-huset, Oshjørnet AS representert ved eigedomsrådgjevar Terje Haugan frå BERAS (Bergen Eiendomsrådgivning AS), har fleire gongar retta seg til kommunen med opplysingar som tilseier at tiltaket er søknandspliktig. Opplysingane har gått på alt frå endring av mengde gjestar til tekniske justeringar på bygget og endring av opplegg frå kafé til nattklubb.

Dette har han gjort for at han ved søknad vil få rett til, som nabo, å koma med merknadar. Haugan vil bygga om Oshjørnet og selja fleire husvære. Forsøk på å selja nye husvære på Oshjørnet har til no vore mislykka.

17. desember 2010: Os kommune svarer på brev frå Oshjørnet AS at lokalet tidlegare har vore godkjent for 200 personar. Etter ombygginga er det godkjent for 250 til 300 personar. Utviding frå 200 til 300 personar "er ikkje å rekna som vesentleg i høve sikkerhet og rømming" og at endring frå pub og kafé til nattklubb "ikkje er vesentleg for omgjevnadane" og derfor ikkje er søknadspliktig tiltak.

12. desember 2011: Os kommune sender brev til Fagerthun om krav om dokumentasjon på støydemping. Den skal etter det Midtsiden kjenner til ikkje ha vore sendt.

31. januar 2012: Rapport frå branntilsyn viser nokre avvik og merknadar. Huseigar får frist til 2. mars med å koma med framdriftsplan til å retta avvik. Partane har møte 29. februar med gjennomgang.

28. februar 2012: Os kommune sender brev til huseigar der dei seier tiltaket likevel er søknadspliktig og ber om fullstendig søknad innan 4 veker. Publikum som var uroa for branntryggleiken i huset skal ha fått kommunen til å sjå på saka på nytt.

2. mars 2012: Brannvesenet sender oppsummering frå møtet med oppramsing av avvik som må utbetrast innan utgangen av april. Ny frist blir seinare sett til 19. mai.

26. april 2012: Os kommune sender førehandsvarsel om pålegg/forelegg/tvangsmulkt dersom ikkje byggesøknad er mottat innan 30. mai.