Klare for å spela på danmarksbåten
– Vi veit ikkje om dei vil ha oss på scenen, men når Fjord Line inviterer til jam så stiller vi, seier Erik og Kurt.
Bildeserie:
I starten på januar gjekk Fjord Line ut og fortalte om styrka underhaldningsprogram om bord på båtane som går frå Bergen til Danmark.
– Gjesteundersøkingar viser at dei reisande stort sett er nøgde med både resatauranttilbod, komfort og underhaldning. No toppar vi laget yttarlegare med kjente norske artistar, seier Fjord Line sin underhaldningssjef Kenneth Smørdal.
Jam-cruise på fredag
I februar er det både quiz, standup med Hans Morten Hansen og show med Ausekarane, i mars er Johnny Logan, Kjell Elvis, Jan Eggum og eit knippe bluesband på scenen ulike helger.
Men det som i første omgang lokka musikarane frå Os og nabokommunane skjer allereie komande helg.
– Når Fjord Line først inviterer til jam-cruise så må vi stilla, seier Kurt Røttingen.
Les òg: Fullt hus og funky stemning (video frå romjulsbluesen, der Kurt var blant dei som spelte)
Saman med Erik Rolland frå Os- og Fusa-baserte Mighty Magnolias skal han øva litt i kveld.
– Dei har fleire flinke band med seg, og vi veit jo ikkje om det blir behov for fleire på scenen, men vi øver no av og til saman uansett.
Fleire frå Os er med på turen
Jam-cruiset inkluderer konsert, cognac-party og jam. Fjord Line har med seg banda Kløver & Skarre R, Kniksen, Ghostfunkers, Discovery og Lisky. Minst eitt av desse banda har med seg musikarar vi av og til ser i Os, tvillingbrørne Tom-Erik og Jan-Åge Svendsen.
– Ine og Emil er òg med, seier Erik om bandkameratane Ine Tumyr og Emil Nordtveit.
– Og Frode Holmefjord (Sambandskameratene), skyt Kurt inn.
Mighty Magnolias, som spelte på Garage med Amund Maarud i november, slepp ny dobbelsingel fredag og speler på premieren på Mandagsklubben på Lille Ole Bull på ... måndag.
Les òg: Mighty Magnolias platedebuterer