Klare for NM på Voss

Det er første gang i historia at NM i fellesstart blir arrangert på Vestlandet. Det er òg første gang i historia at ein klubb står som arrangør av eit NM.

– Det er vanlegvis luftfartsforbundet som er arrangør, men vi hadde lyst til å ta på oss arrangementet. Ikkje minst for å få NM til Vestlandet, fortel arrangementsansvarleg Kato Kvitne I Os Aero Klubb.

Publikumsvennleg flyging

Fellesstart, kor alle seglflya blir dratt opp og startar på likt er i følgje Kvitne ein særs publikumsvenleg variant.

– I vanlege konkurransar styrer ein meir sjølv når ein vil starta. Då blir det mykje meir taktikkeri der ein freister å lesa og utnytta ulike vêrtilhøve i løpet av dagen.

– Her starta alle likt og det blir meir racing og aktiv flyging. I tillegg er det lettare for publikum å følgje med. Den som kjem først til mål vinn dagens etappe, forklarar Kvitne.

Sjå video frå verdsmeisterskapen i Andesfjella.

Tredje gang på Voss

Sjølv om det er første gang Os Aero Klubb NM i fellesstart, har dei arrangert Noregscup-stemne to gonger før (sjå video frå 2015).

– Tilbakemeldingane har vore at det er fantastisk å fly i så spektakulære omgjevnader som vi har i området rundt Bømoen. Det er litt flatere på Austlandet, sjølv om det der òg er fine områder å fly over.

– Kor langt flyr ein då?

– Det varierar litt etter vêrtilhøva, men løypa ligg på mellom 150 og 300 kilometer kor deltakarane ofte ligg meir eller mindre vinge mot vinge. Då eg sjølv var med i fjor låg eg og kappast med ein konkurrent. Skilnaden i mål var berre på eitt halvt sekund, så det ligg ann til tette og jamne race til veka.

Nøyaktig kor løypa kvar av dei seks konkurransedagane går er ikkje satt. Det kjem mellom anna ann på vindretningane og vêret, men områder som er aktuelle er mot Dale, Vøringsfossen, Sognefjorden, Aurland og Lærdal.

– Vêret styrer det meste. Med regn blir divverre konkurransen avlyst. For å få gjennomført NM treng vi berre éin konkurransedag for å få det godkjent, men det kjekkaste er om vi klarar å få til 4-5 konkurransar. Ut frå vêrmeldingane har eg godt håp om at vi skal klara det, seier Kvitne.

Trekk fram Bjørø og Lygren

I det 13-mann sterke feltet stiller Os Aero Klubb med heile seks deltakarar. Totalt i NM i fjor tok Os heim seks av seks medaljar. Arrangementssjefen har tru på gode resultat også i år, men fryktar eit par sterke austlendingar.

– Jo Inge Bjørø er ein ringrev og den mest erfarne vi har, så han trur eg kjem til å gjera det skarpt. Jon Erik Lygren, som tok VM-bronse for juniorar for nokre år sidan er òg ein som kan gjera det skarpt. Eg trur Lygren kan bli farleg.

– Ein skal heller ikkje gløyma eit par av austlendingane som kjem. Per Morten Løvsland frå Sandefjord vann Noregscupen på Notodden førre helg og er tydelegvis i form. Arne Martin Güttler frå DFK/S skal ein òg sjå opp for, seier Kvitne som ikkje har dei heilt store ambisjonane på eigne vegne.

– Det har vore mykje i førebuingane til meisterskapen, så eg har inga ambisjonar i år anna enn å kose meg i lufta.

Glad Ulvatne sa ja

Konkurransane blir leia av konkurranseleiar Leif Jørgen Ulvatne, også han frå Os Aero Klubb.

– Eg blei veldig glad då Leif Jørgen sa ja til å vera konkurranseleiar. Han er desidert den beste på dette i Noreg, så konkurransa er i trygge hender, avsluttar Kato Kvitne.

Konkurransa kan ein følgja på live-tracking om ein søkjer opp Voss Grand Prix på facebook.