Kjørte dragrace på Ostreffet
VIDEO: Os Amcar-Club hadde godt oppmøte på det årlege Ostreffet. Mest action blei det då nokre av deltakarane skulle måla krefter.
Bildeserie:
Ostreffet hamna i år på ein våt andre pinsedag, likevel kunne arrangørane gleda seg over godt oppmøte.
– Det blei ikkje så mykje folk på sals- og leikeområdet vi hadde laga til, men vi er nøgd med at det kom heile 76 bilar til treffet, seier president i Os Amcar-Club, Frank Hetleflåt.
Han fortel at det, etter fem rolege år i klubben, no har byrja å ta seg opp igjen.
– Vi har rundt 130 medlemmar. Nokre av oss møtast annakvar onsdag på Er-An Veikro for ein kaffi og ein softis før vi eventuelt tar ein tur til by'n.
– Klubben fyller 20 år i år, så vi har plan om ein fest på seinsommaren, i tillegg til at vi skal på Røykenes også 4. juli, seier Hetleflåt.
Kom heim med 565 hestekrefter
Drygt halvparten av bilane var tilreisande frå klubbar i Bergen, Askøy, Sotra, Nordhordland - og Høyanger.
Deltakaren frå Høyanger er utflytta osing Svein Sagebakken, som viste fram sin 2006-modell Corvette med 7 liter motor på 565 hestekrefter.
Publikum sin favoritt
Dagens gjestar blei oppmoda om å stemma på sin favoritt av dei 76 bilane i utstillinga.
Vinnaren blei bilen til Frank sin bror Trond, ein Thunderbird 64-modell.
Andreplass gjekk til Sulen frå Sotra sin kvite '58 Cadillac.
Race bak skulen
Ostreffet blei arrangert på Os vidaregåande skule sin plass. Mens parkeringsplassen var fylt med bilar var det laga til ein kort dragracebane på motsett side ned mot Ulvenvatnet.
Eit vanleg dragrace går over 1/4 engelsk mil, altså 402,33 meter. På Ostreffet var det minidragrace, som gjekk over 402 tommar (10,51 meter).
Etter to oppvarmingsrundar blei det utslåing. Svein Olav Nymark vann med sin Camaro (med øvelseskjøring-L på hekken), John Haugland kom på 2. plass i ein Pontiac.