Kjøpte usett - sette ny rekord
Sjøeigedom i Øyane selt for 9,7 millionar kroner.
Bildeserie:
I mai i fjor blei ein bustad på Berge selt for 8,1 mill. 58 interesserte og 5 deltakarar i bodrunde sendte prisen på denne bustaden langt forbi førre prisrekord i Os.
No er rekorden slått med over éin million, rett nok med tilhøyrande naust, men selt usett, utan bodrunde.
Ein bustad med strandlinje, brygge og naust på Sundøy i Søre Øyane er selt for 9,7 millionar kroner.
– Eigedomen er eneståande, det er sjeldan vi får marknadsføra slike unike perler. Det finnest større og meir moderne bustadar, men her er det ein kombinasjon mellom ein flott bustad, eit fantastisk utomhusareal og ei nydeleg plassering med kaianlegg og naust i eigen hage, seier meklar Dino Urukalo hos Kaland & Partners.
Salet skjedde før påske, kontrakten blei skriven då kjøpar i førre veke kom heim.
Eigedomen inkluderer einebustad med fem soverom, garasje, naust, kai og brygge. Samla bruksareal er 382 kvadratmeter, tomta er på rett over 2 mål. Huset er bygd i 1984.
Kjøpt usett av ung mann frå Øyane
Eigedomen blei selt på første bod, som kom dagen etter første vising. Kjøpar var ikkje på vising, har aldri vore inne i bustaden og sat på fiskebåt i Atlanterhavet då han la inn bodet.
– Seljar er ein kamerat av far, men eg har aldri vore inne i huset, nei, seier kjøpar.
Kjøpar, ein mann i slutten av 20-åra, er fødd og oppvaksen i Øyane, og er medeigar i ei av dei maritime verksemdene i krinsen.
– Det er ei god kjensle at slike plassar ikkje blir selt til byfolk på jakt etter rekreasjon nokre månadar sommarhalvåret, men blir selt til nokon med lokal tilknyting.
– Det er ikkje berre kort veg til jobb som betydde noko, huset er flott og det å ha eige naust og kai rett utanfor stovedøra blir jo fantastisk! Det skal bli ein god bryggefest til sommaren, det kan eg lova deg!
Frå både terrassen og brygga kan han no nyta sol til langt på kveld og utsikt mot Sørstrøno, der Herman Friele for to år sidan kjøpte hytte til 17,5 millionar kroner.
Aksepterte bodet
Eigedomsmeklaren seier at han, saman med kollega Julie Mørck, var førebudd på at det kunne ta tid å selja den fine, men kostbare eigedomen.
– Når vi sel slike eigedomar prøver vi alltid å vera gode og tydelege i marknadsføringa inn mot første vising, for å vera trygge på at flest mogleg får sett kva vi har å tilby.
– Det var rundt 11.000 visingar på annonsen på Finn.no den veka vi hadde den ute, og nokre privatvisingar.
– Vi er ofte to meklarar på slike eigedomar, for at vi på kort varsel skal kunna vera tilgjengeleg for private visingar.
Då bodet kom, og var likt med prisantyding, var dei ikkje i tvil om at det skulle aksepterast.
– Vi hadde grundige samtalar om dette med seljar i forkant av annonseringa, og var nøgd med god pris og rask handel.