Måndag morgon fekk politiet melding om tjuveri av to motorsyklar som sto i ein carport i det nye bustadområdet i Hjellemarka på Søfteland.
– Motorsyklane er no etterlyste både i Noreg og utanfor landegrensene, fortel politibetjent Thomas Juulseth til Midtsiden.
Dei to stolne MC-ane:
• KTM 390 Duke, 2017-modell, HW2814
• Ein raud Honda CB500, 2014-modell, TD7425
Politiet ber dei som har høyrd eller sett noko ta kontakt på 02800.
– Vi var på staden i formiddag. Alle tips er av interesse, også om nokon har høyrd noko, for å fastsetja tidspunkt for kor tid dei blei tatt.
Politiet vil førebels ikkje ut med om dei har nokre spor i saka.
– Kjøpte den på fredag
KTM-en blei kjøpt fabrikkny og henta på butikk i Åsane fredag.
– Eg hadde meg ein liten cruisetur til Strøno på laurdag og skulle køyra til jobb med den i dag, fortel eigar.
Sist han såg sykkelen var i 18-tida søndag kveld. Då han klokka 7.15 i dag ikkje fann sykkelen i carporten trudde han først ikkje sine eigen auge.
– Sykkelen sto i eit felles garasjeanlegg utan port. Eg tenkte at nokon hadde tulla med meg og flytta på den, så eg gjekk og leita etter den ei stund før eg innsåg at den faktisk er stolen.
Då han la ut ei melding på ei intern facebookgruppe i nabolaget gjekk ein annan MC-eigar ned for å sjå etter sin sykkel. Denne sto i same garasjeanlegg, og er også vekke.
• Les òg: Stolen MC funnen etter tips