Kjøper i sentrum

Tysdag skal kommunestyret behandla innløysing av festekontraktar frå Opplysningsvesenets Fond (OVF). Forhandlingane har gått føre seg i eit par år før ein no har kome fram til ein avtale for ein del av eigedomane i sentrum.

– Målet med desse samtalane/forhandlingane har vore å prøva å få kjøpt ut sentrale eigedomar som kommunen i mange 10-år har festa, skriv Tor Inge Døsen i saksutgreiinga til kommunestyret.

Blant dei mange festekontraktane kommunen har hatt med OVF, er tomtene kor Os barneskule og ungdomsskule ligg, kyrkjegarden, kyrkjelydshuset, kyrkeflaten og diverse vegareal.

Ein trygg leigetakar

OVF har dei seinaste 10-åra endra karakter og forretningsmessig profil i vesentleg grad.

– I dag er det eit svært mykje større fokus på marknadsverdi og maksimalavkastning på grunneigedomar.

– Så vidt vi er kjende med har det vore ei kursendring over det meste av landet, mest i sentrale strøk, og betydeleg mest markant i vekstområde, der verdi på grunneigedomane har stige mest.

– OVF er i utgangspunktet lite villige til å selja næringseigedomar eller eigedomar som kommunen festar. Kommunene er sjølsagt ein trygg og attraktiv festar, og er ein varig langsiktig forvaltar.

– Kommunen er ein god og solid leigepartnar for OVF, konkluderer Døsen.

Dyrare enn venta

Som det kjem fram av saksutgreiinga har i utgangspunktet OVF vore lite villige til å la Os kommune løysa inn dei prioriterte festeavtalane.

– Men OVF har likevel etter kvart vist forståing for kommunen sin strategiske argumentasjon.

– Os kommune er etter kvart vorte innrømma innløysing for nokre eigedomar. Til gjengjeld vert dei meir kostbare enn venta då forhandlingane tok til hausten 2011.

Sparer nær 8 millionar

Utrekningar gjort i saka viser at kommunen over tid sparer nær 8 millionar kroner på å kjøpa ut eigedomane framfor vidare leige.

Total kjøpesum er summert til vel 21 millionar kroner.

– Innløysingskostandene er høge – og svært høge i høve til historisk årleg avgiftsnivå. Men vi må altså sjå den kursendringa som OVF har lagt seg på inn i ei framtid, skriv Døsen.

Som eit døme på det viser han ei utrekning på parkeringsplassen ved Køvertun, kor det i reguleringsplanen for Landboden er teikna inn bustadar.

Ei oppjustert festeavtale vil kosta kommunen vel 6 millionar på 25 år, medan ein no har forhandla seg fram til ein kjøpssum på 3 872 000 kroner for eigedomen.

– Framtidsperspektivet er dermed slik at eigedomskjøp i sentrale utbyggingsområde frå OVF vert dyrt, men det blir dyrare å betala leige, argumenterer Døsen.

I samband med utviklinga av Osøyro har kommunen også fått kjøpa torgarealet med Øyro og delar av Telthuskvartalet til 2 millionar kroner.

Lukkast ikkje med ungdomsskulen

Kommunen hadde i samband med Landboden-utbygginga også eit ønskje om å få eigedomsretten over tomta kor ungdomsskulen ligg, men dette klarte ein ikkje koma i mål med.

I staden er ein samde om ei festeavgift på 541 250 kroner kvart år.

Avtalen gjev kommunen rett til å nytta nordlege delen på omlag 7000 kvadratmeter til utbygging av private og kommunale boligar med tilhøyrande parkeringsanlegg og gymsal/kulturbygg.

Partane har ei felles målsetting om at Landboden-prosjektet skal kunna gjennomførast.