– Kjempenyttig med utdanningsmesse

Bildeserie:

Full skjerm

1 av 2

BI sin stand var populær då Midtsiden var innom torsdag ettermiddag. Elevar frå Nore Neset ungdomsskule hadde innteke hallen. Rundt på gulvet kravla det rundt med ungdomar, og ved nærare ettersyn var dei i full sving med å svara på ein quiz. Markus Fjæreide, Odin Sørstrønen, Helle Haugtun, Mariell Vindal og Christina Nesheim var svært dedikerte der dei låg.

– Det er kjempenyttig med utdanningsmesse. No veit vi meir om kva vil vil, kjem det frå golvet då journalisten nytta høvet til å snika inn eit spørsmål utanom quizen.

Sjekkar ut skulane

Fleire elevar tykkjer dei har godt utbytte av utdanningsmessa. Nokre av dei er Josefine L. H. Bø, Emma Bahus Heimtoft og Celina D. Dedekam Sveen.

– Vi lærer eigentleg ganske mykje med å vera her. Vi sjekkar ut skular og dei ulike tilboda dei har. Vi får sjå litt kva det går ut på når vi kjem på vidaregåande, seier dei tre.

– Det er noko heilt anna å snakka med dei som går der no, enn å berre sjå i ei brosjyre. Ein får eit litt anna inntrykk av kva dei byr på då, er dei samde om.

– Er det noko som blinkar seg ut for framtida då?

–Musikk, musikk, kanskje helse? kjem det kjapt frå dei tre.

Kø heile dagen

Os kommune sin stand innan pleie og omsorg melder om kø heile dagen. Grunnen er at der kan ungdomane få stikk i fingeren og målt blodsukker.

– Her har vore kø i heile dag, vi har faktisk måtte reisa og henta meir materiell, ler Katrine Helgesen, avdelingssjukepleiar på Luranetunet.

Medan vi pratar, sit Peter på ein stol, lettare bleik, men med støttande kompisar på alle kantar.

– Lærlingane vi har med oss får trent seg på å måla blodsukker, og det er faktisk mange av elevane som besøker standen som spør meir om blodsukker, så dei er lærevillige, seier Helgesen.

- Går det fint etter stikket i fingeren?

– Jada, det går fint, og blodsukkeret var det det skal vera, seier Peter førnøgd, før han ruslar vidare mot neste stand.