Kjærastane Harry (19) og Vilde (17) til finale i Lagunen Fotballfest

Bildeserie:

Full skjerm

1 av 2

Ti lag frå Os og Nore Neset deltar i Lagunen Fotballfestival frå 13. til 24. november. 133 lag er påmeldt i 15 klassar.

Nore Neset/Os jenter 14 tok seg til semifinale, der dei tapte 0-1 for Sædalen, Os G14 og Os G15 speler semifinale fredag kveld.

Os sitt juniorlag bøtta inn med mål i puljespelet, slo Gneist 2-0 i semifinale i går og møter Bjarg i finalen søndag.

– Bjarg er einaste laget som slo oss i puljespelet, så det blir nok ein tøff kamp, seier trenar Ørjan Sandal.

Os fekk fire kampar i puljespelet, og vann 6-2, 8-2 og 13-0. Men innimellom desse tapte dei 2-6 for Bjarg.

Ein noko spesiell kamp blir det òg, spesielt for Vilde Drange Veglo, einaste jente på laget - eit talent på veg vidare i karriera, med kjæraste på same lag.

– Liker stilen til gutane

I fjor spelte Vilde med G16, i årets sesong har ho både spelt med damelaget til Os/Nore Neset og, særleg i haust, med to år eldre gutar.

– Det er tøffare fysisk og tempoet er høgare. Om eg hadde vore vekke frå desse gutetreningane, og så kome tilbake, så hadde det vore knalltøft. Men eg prøver å henga med, seier Vilde.

Ho er i dialog med ny klubb for å satsa vidare innan damefotball. Kva klubb det er vil ho foreløpig ikkje ut med. I mellomtida stortrivst ho med gutane.

– Eg liker det å koma på trening og veta at eg truleg er den dårlegaste på laget, men at eg skal prøva å bita frå meg så godt eg kan. Og så liker eg korleis gutane oppfører seg. Det kan vera kjefting og smelling, og dei snakkar akkurat likt til meg som dei andre. Men etter trening eller kamp er alt gløymt og alle er like gode venar.

Duellane ingen vil tapa

I haust har Vilde spelt seriekampane med gutar 19. Ho kan ikkje hugsa å ha møtt andre gutelag med jentespelarar, og merker at motstandarane prater og peikar litt allereie under oppvarminga.

– Det er ikkje sånn at dei er varsame med meg, heller tvert imot. Ingen vil tapa ein duell mot ei jente, og eg høyrer dei får kommentarar frå lagkameratane når det skjer.

Vilde er nøgd med både speletid og rolle.

– Eg speler i tiar-posisjon, rett bak spissen, akkurat som når eg speler for damelaget. Og eg får ofte spela frå start og gjerne heile kampen.

– Eg er først og fremst stolt

Etter at A-laget sin sesong var over har Harry James Moore vore med på nokre kampar. Dei to har vore kjærastar i rundt eit år no.

– Eg synest det er kjekt at vi speler i lag, men i kamp er han ikkje noko anna enn ein av fleire lagkameratar.

– Det er ikkje sånn at Harry er sjalu, og passar på å få den einaste klemmen om du skårar mål?

– Ha, ha! Nei, det gjer han ikkje. Alle jublar i lag.

I siste seriekamp spelte Os mot Sædalen og vann 13-0.

Vilde skåra 3-0-målet i 20. minutt, venstrebacken Harry la på til 4-0 i 34. minutt.

Harry synest heller ikkje det er rart å ha kjærasten med på kamp.

– Du er ikkje ekstra beskyttande når ho går i duell?

– Nei, det treng eg ikkje. Så langt ser det ut som om ho gir meir juling enn ho får!

– Eg er først og fremst stolt over at ho er så god, seier mister Moore.