Kick-off på Kuventræ

Laurdag var 33 av 35 spelarar på Os og Os 2 samla for premieutdeling i vinterligaen og sosial samling med FA Cup på storskjerm.

– Alt var vellykka, bortsett frå FA-cupen, som vi ikkje fekk inn på skjermen. Då blei det Barcelona mot Real Sociedad i staden. Ingen dårleg erstattar, seier Bjørn Mjelva.

Mjelva gjekk i vinter frå å vera hovudtrenar for gutelaget til å assistera Tore Nielsen med A-laget. Samstundes skal han ha hovudansvaret for juniorlaget.

Les òg: Duka for brakstart (Os - Lysekloster 13. april)

– No står vi med to seniorlag og to juniorlag og alle 70 kjører trening fem gongar i veka. Store trenar- og støtteapparat står klar i begge leirar.

Frå gras til kunstgras

I midten av november kom det fram at styret i Os Turn Fotball vil endra hovudarena for A-laget, som etter nesten 60 år på gras i år skal over på kunstgras.

Les òg: A-laget droppar grasbanen

Ikkje alle spelarane var like glade for dette, og det har i ettertid vore diskusjonar om det kan bli spelt på gras nokre år til, fram til dagen kjem når ny arena skal byggast og gras og jord må skiftast ut.

– Men vedtaket står ved lag og dette blei spelarane orientert om. Dei var nok førebudd på kunstgras no, det blei ikkje nokre diskusjonar om avgjerda denne kvelden.

3-4 opprykk

Os hadde ingen juniorlag i fjor, men dei talentfulle førsteårsjuniorane har målsetnaden for dei to juniorlaga klar.

– Vi må melda oss på i 3. divisjon, sidan vi er ny i klassen, men har mål om opprykk til sommaren. Med førstelaget bør vi vinna også 2. divisjon til hausten, så vi kjem oss i 1. divisjon til 2014.

A-laget har også ambisjonar.

– Vi skal gjera det betre enn i fjor, topp tre er målet. Og når vi målet, held oss skadefrie og har litt flaks så kan det bli opprykk.

For 4. divisjonslaget er målet å stabilisera seg i 4. divisjon etter opprykket i haust.

Børge vann, Simen fekk premie frå i fjor

Børge Borgen vann vinterligaen etter åtte rundar med kampar før jul, og fekk treningsklede i premie.

På dei neste plassane kom Espen Borgen og Fredrik Heggland.

Simen Lassen, som no er Brann-spelar, vann vinterliagen førre vinter, men hadde ikkje fått premie.

– Det ordna vi på laurdag. Og kva er vel meir naturleg å gje til den som har vore mest på Kuventræ med ball i 2012, enn ein ball, spør Mjelva.

Sander blei toppskårar

Det komande juniorlaget hadde sitt kickoff og årsavslutning før jul.

På Os 1 blei Adrian Valle kåra til årets spelar, Aksel Skaar den mest framgangsrike og Sander Kvittingen var årets toppskårar.

På Os 2 blei Mathias Sundfjord kåra til årets spelar, Dan Hægland den mest framgangsrike og Adrian Walle var årets toppskårar.

På Os 3 blei Bendik Sundfjord kåra til årets spelar, Eirik Tysseland den mest framgangsrike og Steffen Ljosheim var årets toppskårar.

På bildet til høgre, bak frå venstre: Mathias Sunfjord, Eirik Tysseland, Adrian Valle, Aksel Skaar og Sander Kvittingen.
Framme frå venstre: Steffen Ljosheim, Bendik Sundfjord og Dan Hægland. Adrian Walle var ikkje med på bildet.