Keeper henta med ambulanse
Kampen mellom Os og Norheimsund sine damelag fekk ein brå slutt.
Søndag ettermiddag spelte Os mot Norheimsund. Os vann 2-1 borte i vår og tok også styringa i dagens kamp.
Os - Norheimsund 4-1 (0-1)
Men på 4-1-leiing cirka 20 minutt før slutt fekk kampen ein litt dramatisk slutt.
– Norheimsund-keeperen slengte seg etter ein ball, landa oppå den og mista pusten. Etterpå besvimte ho, fortel Os-trenar Cato Moldskred.
Ambulanse blei tilkalla og laga blei einige om å avslutta.
Jentespelar skåra i debuten
Os hadde overtaket og skapte mykje i første omgang, men nokre sekund med litt slurv var nok til at gjestane gjekk opp i leiinga.
To spelarar frå Os sitt jentelag debuterte i dag, og Guro Veglo, som kom innå før pause, utlikna for Os.
Tonje Lindbom, som kom innpå etter pause, var involvert i 4-1-målet då ho pressa Norheimsund til sjølvmål.
– Dei klarte seg veldig godt begge to. Det hadde vore kjekt å sjå dei spela 20 minutt til, men med keeper sin kollaps blei det i staden ein brå slutt på kampen.
Dei to andre måla til Os blei skåra av Lillian Korneliussen og Charlotte Balland.