Kan dei skjenkja sjølv?

Under politisk kvarter i formannskapet sitt møte tysdag stilte Jon Sivert Rykkel (V) spørsmål om det lot seg gjera å sjå på skjenkepraksisen på Oseana no når ein skal ha inn ny drivar av serveringa på huset.

- Tilbakemeldingane frå frivillige lag og organisasjoner er at det er vanskeleg å legga arrangement til Oseana fordi dei ikkje får inntektene frå øl-salet.

- Berre billettinntekter er ikkje nok til å få arrangementa til å bera seg, argumenterte Rykkel.

Må få selja øl

Han nytta rockeklubben sitt 30 årsjubileum i Fjellheim som eksempel:

- Dei hadde omlag 300 gjestar, selde vel 1000 øl, og satt att med eit ok overskot.

- Eg trur det kan gje lokale lag og artister ein stimulans til å arrangere ting i Oseana.

- Oseana taper ikkje penger på det, restauranten treng ikkje involvera seg og dei lokale laga og artistane kan med større sannsynlegheit klara å laga eit arrangement som ber seg, argumenterte Rykkel.

Fleire som vil krevje det sama?

Ordførar Terje Søviknes (Frp) tok på seg styreleiarhatten då han skulle freiste å svara på Rykkel sitt framlegg.

- Dette er ein vanskeleg diskusjon som vi har brukt mykje tid på i styret til Oseana.

- Det er nok riktig at vi kunne fått inn nokre fleire lokale arrangement, men samtidig er det fare for at nokre av arrangementa som allereie er inne ville stilt krav om også å få skjenkje og dermed svekkje driftsgrunnlaget for Oseana.

- Kor går grensa mellom lokale og ikkje-lokale arrangørar, undra Søviknes.

Omdømme og reglar

Momentet styret og administrasjonen i Oseana har lagt mykje vekt på i sine diskusjonar er omdømmet til huset.

- Oseana skal vera eit produkt kor ein opplever ein heilhet på arrangement og aktiviteter.

- Også når det gjeld skjenkjesida skal ein oppleve denne heilheten. Vi kan ikkje få ein situasjon kor dette løper løpsk, meinte Søviknes, som samstundes la til at dettte nok kunne sikrast gjennom avtalar mellom huset og arrangør.

- Den siste utfordringa er det formelle.

- Fleire aktørar har ikkje lov å skjenkje på det same arealet, då må den som har det opprinnelige løyvet seie dette frå seg for den aktuelle perioda.

- Akkurat det same gjeld for servering. Ein kan ikkje servera betasuppe og hot-dog som ikkje er produsert i tråd med Mattilsynet sine reglar, forklarte Søviknes.

To konsept

Styret i Oseana er i dialog med aktuelle restaurantørar og drøftar i desse dagar kva konsept dei vil gå for i høve servering på Oseana.

- Plan A er å ha eit konsept likt det vi hadde med Færingen, kor vi set bort alt.

- Plan B er å ta det in-house og driva det i regi av KS-et med eigne folk, forklarte Søviknes som skal drøfta saka i styremøte onsdag.

Oseana KF fekk forøvrig skjenkeløyve for heile Oseana i formannskapet tysdag etter at dei sidan Færingen flytta ut har måtte søkje om ambulerande løyva for kvart einskild arrangement.