Kalv stakk frå Storum
Ein ung kalv har vore på turné mellom Storum og Thuen sidan måndag. – Han er ikkje lett å få tak i, seier eigar, og etterlyser tips.
Då bonden Jon Grindevoll sette ut kalvane på beite måndag, stakk ein av dei av.
– Eg hadde kjørt tre kalvar ut til beitet på Storum, og då eg kom til beitet igjen med tre til, såg eg at ein av dei sto litt for seg sjølv.
– Eg prøvde å lokka han ned til dei andre, men då tok han ut og hoppa over gjerdet, fortel Grindevoll.
Jon fekk hjelp av viltkontakt Espen Andersen til å søka etter kalven.
Spor viser at han har sprunge frå Storum til Ravneberghaugen, tilbake til Storum, ut mot Særvoll og bort til Thuen.
– Men vi har ikkje fått tak i han og no har han vore så lenge vekke at det er tydeleg at han har bestemt seg for å vera på rømmen.
Kalven, som blei fødd i februar, er svart med gul merkelapp (nr 1117) på øyra.
Om du treff på ein laus svart kalv kan du kontakta Grindevoll på 922 84 910.