K-Jell i studio igjen

Rockeveteran Kjell Engelsen Moberg og bandet hans, K-Jell, som består av Jostein Steinsland (gitar og produsent), Trond Bergsvik (bass) og Bjørn Tore Taranger (trommer), har byrja å spela inn musikk igjen.

– Vi er travle familiefedre så det blir litt i rykk og napp. Det blir mykje sending av filer til og frå kvarandre, og éi øving rett før vi skal i studio, seier Kjell.

I sommar har dei spelt inn tre coverlåtar, What More av Subs frå Beijing, Samfunnsrotter, av det tidlegare Os-bandet Di Håpløse, og Galt et sted av punkbandet Øresus.

– Coverlåtar er ikkje det eg har mest erfaring med, men det er ulike årsakar til at vi spelte inn akkurat desse låtane.

– Subs, som gjesta Noreg og Os og spelte for 30-40 gjestar på Bar2Be i 2005, har vakse seg store og speler no for 10.000 til 30.000 publikummarar fleire gongar i månaden. Dei fyller no 10 år som band og fleire band gjer coverlåtar som ei gratulasjonshelsing, seier Moberg, som har samarbeidd mykje med Subs dei siste åra.

Ny innspeling av gamal punk

Dei to andre låtane er også noko Kjell har sine grunnar til å spela inn.

– Galt et sted er ei partypunk- allsonglåt eg har hatt lyst til å spela sidan eg var ung, men den er teknisk krevjande og eg fekk det rett og slett ikkje til på 80-talet, ler Moberg.

– Samfunnsrotter blei spelt inn av punkbandet Di Håpløse tidleg på 80-talet, men det var berre ein demo, låta kom dessverre aldri ut på plate.

– Tom Haakon Brekke og resten av Di Håpløse var eit spennande band, og var blant anna på tur der dei varma opp for Vannskrekk, gjengen som seinare døypte bandet sitt om til ikkje ukjente DumDum Boys.

Fire nye på EP til hausten

Sjølv etter innspeling av tre låtar er dei travle veteranane i K-Jell ikkje ferdige med denne omgangen med studioinnspeling.

– Det blir ikkje tid til å gå på med fullt album, men eg har fire nye låtar, alle på engelsk, som vi vil spela inn no etter ferien.

Innspelinga skjer i studioet til bandmedlem og produsent Jostein Steinsland i Samnanger.

– Vi blir nok klare med EP-en i slutten av september, om alt klaffar.

Kina - og kanskje Skottland

K-Jell hadde sin tredje turné i Kina i 2011, eit halvt år etter at regimekritikar Liu Xiaobo blei tildelt Nobels fredspris.

– Den turen blei ikkje som dei andre. Arrangørane av konsertane og festivalane vi spelte på fekk ikkje reklamera med noko norsk band, og på fleire område merka vi at det ikkje var lett å vera norsk i Kina.

– Men det har nok roa seg, i alle fall på vårt plan, og vi har allereie signal om at 2014 kan bli eit veldig spennande år for oss i Kina.

I tillegg har Kjell med kompisar i juni vore i Skottland og høyrt fleire gjenforeinte britiske punk-band.

– Det blei ein fin tur og nokre fruktbare samtalar med sjappeeigarar og konsertarrangørar, så det kan henda vi tar K-Jell på tur til Skottland.

– Men i så fall treng vi lokal drahjelp, eit band folk kjenner som kan dra folk. Vi har kome langt forbi det stadiet at vi trur vi er noko.

Men eitt og anna helte-status-augneblink har det vore i utlandet.

– I 2010 spelte vi for 10.000 publikummarar på ein festival i Beijing, klokka 13 om dagen! Det var heilt vilt, ei utruleg oppleving for oss hobbymusikantar frå Vestlandet, seier Kjell Engelsen Moberg.