«Jul rundt svingen» lager utekino igjen
– Vi har auka kapasiteten noko i år.
Mens Lekven kallar seg «Julabygdo» er det «Jul rundt svingen» lengre sør på Søre Neset, nærmare bestemt frå Halhjemsmarka 256 vis a vis 274 og innover.
Det starta med Griswald-tendensar (for dei som har sett «Hjelp det er juleferie») og ein idé om å laga eit arrangement for småbarnsfamiliar i 2017.
Utekinoen blei godt besøkt.
I 2018 kom det endå fleire gjestar.
– Dette skal vi halda fram med,sa dei den gong, men det gjekk fire år.
– Vi fekk ikkje tid til å gjennomføra i 2019, og så kom pandemien, seier Kent-Eivind Storum.
No er han saman med naboane, blant andre Torodd Bolstad, Christian Hitland og Eivind Storli, klar for å rigga til utekino og kafé igjen.
Søndag klokka 17 startar filmen.
Arrangørane har valt ein noko kortare film i år, så ikkje ungane skal frysa eller bli lei av å vera i ro utandørs.
– Kinoen er gratis og open for alle, men dei som eventuelt kjem med bil må parkera nede ved idrettsanlegget eller ved skulen.
Saman med kinoen kjem kafé i eige salstelt.
– Mange er også spente på kapasiteten på popcornmaskina Kent-Eivind har kjøpt, seier Christian og ler.
Maskina såg stor ut på bildet naboen sendte, men Storum prøver å tona det heile ned, og er nær på å innrømma at bildet han sendte til naboane laug litt på storleiken.
I år går inntektene frå kafeen til ein lokal, veldedig organisasjon.
Arrangørane har dessutan fått sponsorar, Sparebanken Vest, Kiwi og Montér har stilt med pengar eller varer som utekinokafeen kan selja.
– Vi får låna stolar av barneskulen. Nytt lydanlegg er også kjøpt inn, så vi skal kunna underhalda endå fleire i år.
I mellomtida blir det pynta vidare i gata. Og lagt noko press på dei naboane arrangørane meiner har litt å gå på.
– Det er ein nede i gata her som driv ein butikk som blant anna sel julelys. Han blir pusha litt ekstra om dagen, seier Kent-Eiind og ler.
Det er meldt opphaldsvêr og 2 minusgradar søndag ettermiddag.
– Det viktigaste er at det ikkje kjem mykje nedbør eller vind. Vi set opp nokre bålpanner, men folk må kle seg godt.
