Jonsok-rekord i Vikjo
Bildeserie: Det var reine folkevandringa til Mobergsvikjo torsdag ettermiddag. – Eg trur vi er omlag 1500 her no, kommenterte Berit Steen.
Bildeserie:
Torsdag ettermiddag skinte sola frå knallblå himmel og ein kunne oppleva noko som minna om ei folkevandring frå Os sentrum og ut mot Oseana og Mobergsvikjo kor grillane var tende og bålet klargjort.
– Vi har vore nøydd til å ta bålet noko ned av tryggleiksomsyn. Det bles litt mot land, så vi tek ikkje risikoen for at gnister skal sprute på folk, forklarte arrangementssjef ved Oseana Kunst- og kultursenter, Berit Steen, før bålet blei tent nøyaktig klokka 17.
Ny rekord
Då var allereie grasbakkane i vikjo fyld av sommarglade og forventningsfulle born og vaksne som kosa seg med medbrakt grillmat og kvarandre.
– Det har aldri vore så mange her som i år. Heller ikkje det første året, då vi anslo det til å vera rundt 1000 var vi så mange. Så vi er nok rundt 1500 her no, konkluderte Steen medan Spelemannslaget og Durspelsamskipnaden spelte i bakgrunnen.
Feirar du jonsok med bål og kos i kveld, så send oss gjerne ein stemningsrapport med bilete på e-post til andris@midtsiden.no, som melding på Midtsiden si facebook-side eller på instagram med #mellomfjordarogfjell.
God jonsok-feiring!