Jonatan Brekke i Norske Talenter
I morgon kveld kan du sjå om Jonatan Brekke frå Os kan triksa seg vidare i den tiande sesongen av det populære TV2-programmet.
Bildeserie:
Norske Talenter kom måndag i gang med sin tiande sesong på TV2.
Programleiar Solveig Kloppen har saman med dommarpanelet; Mia Gundersen, Bjarne Brøndbo, Janne Formoe og Mona Berntsen, reist Noreg rundt på jakt etter spanande, imponerande og morosame talent.
Eitt av talenta dei traff på er fotball-triksar Jonatan Brekke frå Os, som saman med treningskompis Marius Digranes frå Bergen ville imponera dommarane med heftige balltriks.
Gjorde opptaka i april
– Vi gjorde faktisk opptaka heilt tilbake i april, fortel Brekke. Det heile gjekk føre seg på eit hotell på Sandsli.
Brekke fortel vidare at han har trent mykje saman med Digranes dei tre siste åra.
– Vi melde oss på saman, og tanken bak det heile var at dette kunne vera ein god plass å visa seg fram på.
Hadde gjort seg med ein halv million
Brekke fortalde til Midtsiden i september 2018 at han hadde som mål å bli verdsmeister.
– Fleire av dei eg har konkurrert mot har dette som jobb. Nett no kunne eg trengt nokre sponsorar, sånn at eg kunne hatt ein reisekasse å ta av, sa han då.
Brekke er faktisk ikkje heilt sikker på kva premien til vinnaren av årets sesong er, men han meiner å ha høyrt at det tidlegare har vore snakk om 500.000 kroner.
– Ja, ein slik sum hadde kome godt med, er den ærlege kommentaren til målet om å bli vinnaren av årets sesong.
– Kan du fortelja noko om korleis det gjekk på scenen for deg og Digranes? Kva for kommentarar fekk de av dommarane?
– Nei, eg har ikkje lov til å seia noko, men sjå på TV2 i morgon kveld så får de veta, svarar Brekke løyndomsfullt.