Jodel - eit problem i Os?

Det har vore ein del uro kring Jodel rundt om i landet i vinter. Medieomtalen har ikkje vore av det mest flatterande slaget, då mobbing og truglar har vore hypping nemd i same andedrag. Mellom anna har anonyme truslar på denne appen ført til evakuering og stengde skular enkelte stadar.

Nokre jodlarar som har gått over grensa har fått «munnkorg» i den forstand at dei har blitt utestengt frå appen, og i nokre område i Noreg har Jodel vore heilt stengt for bruk. Midtsiden kjenner til at minst éin person på Os er utestengt frå Jodel.

– Fleire opplever det som eit problem

Midtsiden har vore i kontakt med begge ungdomsskulane, Os vidaregåande og Os Gymnas om appen. Ved nokre skular gjev uttrykk for at dei ikkje kjenner så godt til Jodel og eventuelle hendingar som har oppstått som følge av den. Andre ønskjer å diskutera problemstillinga internt før dei uttalar seg.

Terese Johnsen, inspektør ved Os ungdomsskule, seier ho vart gjort merksam på appen for nærmare ein månad sidan.

– Eg veit at ein del av elevane våre brukar denne appen og at fleire synest det er problematisk. Elevane er redde for ikkje å få med seg det som vert posta, sjølv om dei gjev uttrykk for at dei ikkje liker det som vert formidla. At alt er anonymt gjer alt ekstra vanskeleg. Likevel verkar det som om det er få som følgjer oppfordringa om å sletta appen.

Jodel er heller ikkje ukjent for politiet i Os.

– Nyleg blei ein person meldt for mobbing via Jodel. Dette er ganske ferskt, så eg kan førebels ikkje seia meir om det, fortel politioverbetjent Audun Hadler-Olsen.

Anonym fristad

Jodel er ein tysk app som tillet deg å leggja ut anonyme meldingar som andre «jodlarar» i ti kilometers omkrets av deg kan lesa.

– Vi ser at Jodel bli brukt som ryktespreiingskanal, og borna kallar kvarandre veldig ufine ting til tider. Vi merkar at det påverkar skulekvardagen fordi det ofte er sårande ting som blir posta, og elevane tek med seg dette «fritidsfenomenet» inn i skulen.

– Vi har alltid mobbing på agendaen vår. På planleggingsdagar og foreldremøter. Sosiale media er med å gjere det vanskelegare å fanga opp det som føregår, både for oss i skulen og dei vaksne heime. Vi tykkjer likevel det er viktig å prøve å bevisstgjera alle på kva makt som faktisk kan ligga bak ein app, avsluttar Johnsen.

Gode nok kontrollsystem?

– Vår visjon for Jodel er å skapa eit samfunn der studentane kan uttrykke seg fritt og samhandla med samfunnet rundt seg. Vi tillet ikkje brot på våre ti Jodel bod (alle Jodlarar må akseptera desse før sitt første innlegg), som til dømes trugslar, mobbing, eller å oppgje telefonnummer eller skriva namn. Vi jobbar med å forbetra systema våre for å hindra slik uønska åtferd kvar dag, seier Sarah Hernandez i Jodel.

I appen ser ein likevel relativt hyppig at det vert posta telefonnummer, namn og kallenamn som allmenkjende gjer identifisering lett i ein del tilfeller.

Jodel har ikkje svart på spørsmål om kontrollrutinar og system som plukkar opp overtramp mot retningslinene.

Anonym - men ikkje usynleg

Sjølv om Jodel vert beteikna som ein fristad der ein anonymt kan uttrykka det ein vil, går grensa ved lovbrot.

– Andre jodlarar veit gjerne ikkje kven du er, men det gjer vi, – Jodel har ein brukar til brukar anonymitet, men det er ikkje eit lokalt «darknet» for oss.

– Om og når det er naudsynt samarbeidar vi tett med politiet. 99 % av innlegga er kreative, tolerante samtalar, og vi aksepterar ikkje at ein prosent av brukarane våre misbrukar Jodel og dei fastsette retningslinjene.

Ønskjer utvikling

Jodel vart opprinneleg laga for høgskule- og universitetsstudentar, men her til lands har den fengja ei langt yngre brukargruppe, trass i 17 års aldersgrense. Per i dag er Jodel gratis, og utan reklame og andre synlege former for kommeriselt bodskap.

Hernandez seier at dei ynskjer behalda Jodel som eit gratis tilbod, og at dei har mange idear for korleis Jodel kan utvikla seg i framtida, utan at ho vil koma nærare inn på det.