Jenter skremd av folk i bil - hadde ei religiøs forklaring

Fredag ettermiddag blei politiet kontakta av nokre jenter i Søre Øyane.

– Dei hadde blitt skremd av ein bil dei trudde følgde etter dei, fortel politioverbetjent Atle Birkeland.

Etterpå hadde folka i bilen sett i postkassar og banka på dører.

– Vi kom i kontakt med bileigar, som stadfesta hendinga, og forklarte at dei var knytt til polsk avdeling av Jehovas vitner og ønskte kontakt med polske borgarar.

Tidlegare på fredag blei politiet kontakta av ein barnehage, som hadde funne noko som ser ut til å vera marijuana, og brukarutstyr, inne på barnehage sitt område.

– Det er naturlegvis ikkje bra. Vi vil følgja opp ved å halda eit auge til denne barnehagen på kveld og nattestid.

I 22-tida fredag kveld fekk politiet melding om både smell og flammar bak fotballbanen på Halhjem.

– Patrulje var på staden og kom i kontakt med vitne. Det var tydeleg at det har vore opne flammar på staden, men det var ingen personar der då politiet kom fram.