Jentene tok styringa
Fotballskulene • På Nore Neset var det jentene som var sjef då idrettslaget inviterte til fotballskule.
Bildeserie:
Som på Kuventræ blei fotballskulen på Nore Neset avslutta onsdag med turneringsspel. Medan det var "landslag" som møttest på Kuventræ var det Napoli, Barcelona, Dortmund, PSG, Atletico Madrid, Arsenal og Chelsea kampen sto mellom og på sidelinja var det jentespelarane frå Nore Neset som var coachar.
– Det er veldig kjekt å ha med jentene som instruktørar på skulen. Dei fleste av dei har sjølv vore deltakarar så seint som i fjor, fortel "rektor" Jørn Vegard Berge.
Fleire på cup
Rett skal vera rett, også gutespelarar frå klubben har vore med som rettleiarar medan fleire av dei andre spelarane har vore på Sør Cup i Kristiansand, kor G14-laget vann B-finalen.
– Litt utfordring har det sjølvsagt vore at fleire av spelarane har vore avgårde på cup samstundes med fotballskulen, men ikkje meir enn at vi har handtert det.
God hjelp
Dei 70 deltakarane frå 2. til 7. klasse har fått oppleva tre dagar med ulike poster og oppgåver.
– Det har ikkje berre vore fotball. Vi har òg hatt klatring, agility og rein leik. I tillegg til å nytta dei to kunstgrasbanene har vi òg fått låna kultursalen på barneskulen, og idrettshallen.
– I tillegg har aktivitetshuset stilt opp og laga mat til alle deltakarane, fortel ein takksam Berge.
Sjå også bildeserie frå fotballskulene på Søre Neset og på Kuventræ.