Janusbutikken er selt

- Årsaka til at vi sel butikken er at vi i vår strategiplan har bestemt at vi skal halda oss til produksjon og sal til forhandlarar, ikkje butikkdrift. No gjer vi det same med janusbutikken på Os som vi gjorde med den på Voss for ein del år sidan, sel til ny drivar, seier marknadsdirektør i Janusfabrikken AS, Arne Fonneland.

Butikken skal ha tilsvarande utval som no, også utgåtte kolleksjonar, 2. sortering og andre varer til reduserte prisar.

I tillegg til butikkane på Voss og Os er det to Janus-butikkar på Island, og eit fabrikkutsal i fabrikklokala på Espeland.

19-åring overtar
Laurdag 1. august overtar Saritha Stokke som eigar av Janusbutikken på Os. Saritha er 5. generasjon Stokke med tilknytting til Janus-bedrifta.

- Saritha har jobba hos Janus i mange år, ved sida av skulegang. Ho er ei flink og energisk jente, og då ho kom og sa at ho ville kjøpa butikken på Os var det ikkje vanskeleg å seia ja, fortel Fonneland.

Janusbutikken på Os skal drivast på same måte som før. Dei tilsette i butikken har fått tilbod om å halda fram for Janus.

- Dei har Janusfabrikken som arbeidsgjevar, så det er her på Espeland at vi har tilbydd dei jobb. Éi har takka ja, éi er i dialog med ny butikkeigar om vidare engasjement på Os opplyser marknadsdirektøren.