Jaktar innbrotsbande

Torsdag i førre veke gjekk politiet ut og etterlyste ein blå litt eldre stasjonsvogn av typen Mazda eller Toyota i samband med innbrot og grovt tjuveri frå ein bustad på Kuhnle.

– Vi har fått inn ein del tips på bilen etter at vi gjekk ut med etterlysinga.

– Det er veldig positivt, men vi tek gjerne i mot fleire, seier politioverbetjent Terje Sperrevik.

Lett omsettelege varer

Politiet ser enkelte fellestrekk mellom innbrota dei siste månadene.

– Eit fellestrekk er mellomanna at dei tek med seg varer som er lett omsettlege og har ein verdi.

– Dømer på dette er smykker og lignande. Større ting har dei latt stå.

– Det er ein ubehageleg følelse å ha hatt ukjende i huset, i tillegg er tinga dei tek med seg gjerne ting huseigar er glad i som arvegods, seier Sperrevik.

Rekogniserar

Husa som har fått besøk av ubodne gjester ligg alle relativt synleg til frå vegar og lignande.

– Innbrota har skjedd i hus og huseigar har vore vekke i kortare eller lengre tid.

– Dette kan tyde på at dei gjer ei viss rekognisering på førehand. Vi mistenker at dei parkerer eit lite stykkje frå og tek seg til fots den siste stubben, fortel Sperrevik.

Saman skal vi stoppa dei

I tillegg til tips i dei fire sakane ber Sperrevik folk hjelpe kvarandre.

– Avtal med naboane at dei ser etter huset ditt om du skal vekk.

– Ta ei runde rundt nabohuset og hjelp til med å ta inn avisar og lignande, oppmodar politioverbetjenten.

– God nabohjelp er viktig for å hindra innbrota.

Politiet jobbar ut frå dei tipsa dei har fått og har god tru på at dei skal løysa sakene, men ønskjer stadig tips om nokon har observasjonar frå områda innbrota har skjedd i.

Politiet kan kontaktast på 56 30 39 00 eller 480 02 480.