Innmeldingane renn inn
Os Næringsforum etablert med slagkraftig interimstyre: Dei første innmeldingane trengte ikkje styret venta lenge på.
Bildeserie:
Under næringslivsfrukosten i Oseana tysdag blei interimstyret for Os Næringsforum presentert av initiativtakarane Espen Aspenes (Frp) og Ståle Skaathun (H) frå kommunen.
Planene om forumet blei første gong presentert for næringslivet, kor kommunen og fylket løyvde 100 000 kroner kvar til å få forumet på beina.
– Kommunen har veldig tru på eit næringsforum som dette. Vi som politikarar treng eit talerør som kan snakka om næringslivet sine behov frå kommunen.
– Difor har ein av tankene vore at det skal vera fritt for politikarar som òg har sentrale verv i kommunen, forklarte Ståle Skaathun.
Det var 130 deltakarar på den årlege, populære frukosten som Os kommune inviterer til.
Breidt samansett
Etter at vel 20 interessentar skreiv seg på listene under eit møte i regi av DNB i Osbadet i midten av februar, har dei to jobba med å setta saman eit interimstyret som kan leiia arbeidet vidare fram mot det første ordinære årsmøte.
– Formålet med forumet er å ta vare på og utvikla næringslivet sine interessar i Os og omegn, fortalde Aspenes før han presenterte dei 7 i interimstyret.
Dette er interimstyret:
- Kjetil Vasby Bruarøy, media (leiar)
- Geir Arne Veglo, konsulent
- Geir Bjørkeli, handel/maritim
- Kristian Borgen, industri/betong
- Inger Berit Bøyum, reiseliv
- Astrid Dale, fiskeri
- Anita Egge, finans
Kjapp respons
Dei første påmeldingane kom i løpet av møtet i Oseana, og då Bruarøy kom tilbake til kontoret låg det fleire innmeldingar som hadde blitt sendt på epost umiddelbart etter møtet.
– Vi klarer kanskje ikkje å laga eit forum som er interessant for alle, alltid. Det er mange ulike bransjar og storleikar på selskapa i Os. Men eg trur og håper at vi klarer å laga eit forum som er interessant for mange, ofte, seier Kjetil Bruarøy.
– Ser vi berre på deltakinga her i dag så ser det jo veldig lovande ut, legg han til.
På møtet blei det delt ut eit spørreskjema blant dei som var tilstades kor ein ba om tilbakemeldingar om kva som bør vera forumet sine viktigaste saker, kva som skal til for at møta skal opplevast som interessante å komma på, kva foredrag som kan vera interessante, kva tidspunkt som passar best, kor ofte ein bør samlast og kor lenge kvart møte bør vara.