Innfører nytt våpenamnesti

Regjeringa beslutta 13. januar å innføre eit tidsbegrensa nasjonalt våpenamnesti.

– Det tyder at du i perioden frå 1. mars til 31. mai kan kontakta oss for å melde frå om du har eit uregistrert våpen liggande heime, fortel politioverbetjent Audun Hadler-Olsen ved Os lensmannskontor.

Målet med amnestiet er å få vekk ulovlege våpen. Det blei gjennomført tilsvarande våpenamnesti i 2003/2004 og i 2008. Då blei det innlevert omlag 35 000 og 7000 skytevåpen til politiet.

– Ulovleg våpenbesittelse utgjer ein risiko for samfunnet. Erfaringar viser at våpenamnesti er eit godt virkemiddel for å redusera talet på uregistrerte skytevåpen, seier justis- og beredskapsminister Per-Willy Amundsen (FrP) i ei pressemelding.

Kan få våpen etterregistrert

Amnestiet inneber at dei som har registreringspliktige skytevåpen utan å ha tillatelse, slipper straff om dei varslar politiet i det aktuelle tidsrommet.

– Det er grunn til å tru at det framleis er ein del ulovlege skytevåpen, våpendelar og ammunisjon i privat eige. Eit nytt våpenamnesti vil bidra til å betre politiets våpenkontroll, seier Amundsen.

Våpenamnestiet vil bli gjennomført på same måte som tidlegare. Det vil vera mogleg heit for etterregistrering, vidaresal, deaktivering eller destruksjon av uregistrerte og registreringspliktige skytevåpen. I tillegg vil det bli lagt til rette for innlevering og destruksjon av ammunisjon og innlevering av våpen eller liknande som ikkje er registreringspliktige skytevåpen, men som er forbode å eige eller ha etter våpenlovgivinga.