Innefotball på høgt nivå
Frå gutespelar til veteran, fleire med fartstid frå høgt nivå både innandørs og ute, var i helga i sving i Os Futsal Elitecup.
Bildeserie:
Dagleg leiar i Os Fotball, A-lagsspelar Endre Brenne, har også i år arrangert turnering i innandørsfotball (futsal) i Oshallen.
– Vi blei berre 9 lag i år, det optimale ville vore 16, seier Brenne.
Dei fleste laga besto av lokale spelarar, venegjengar i ulike årstrinn, frå 15 år og oppover i alder. Spelarar på Os, Varegg og Åsane var blant deltakarane.
Jamn og god turnering
Han har sjølv fartstid for Boca Juniors, eit futsal-lag som «vann alt» av cupar ein periode, og hadde både osingar og tilreisande kameratar på laget sitt. Også sportssjef Jan Frode Skeie og Os 2-trenar Karl Kvile stilte opp for Brenne og brynte seg på ungdomen.
– Det blei ei betre gjennomføring enn i fjor. Dei fleste kampane blei jamne og med Frode Wold som dommar blei det heile leia på ein stødig måte.
Kampane varte i 13 minutt utan pause, mot 2 x 20 minutt i vanleg serie. Les meir om futsal på Wikipedia.
Forsvarte tittelen
Dei ni laga blei delte i to puljer, der dei to beste i kvar pulje gjekk til semifinale.
Boca Juniors tapte semifinalen mot Sunday League Football, mens tittelforsvarar Team BESØ slo Ivory Toast i sin semifinale.
BESØ, som blant anna består av Frode Øye og Kjetil Hansen frå Os, vann finalen 3-2 over Stian Lunde og kameratane på Sunday League Football.
– Vi kjem nok til å gjera dette fleire gongar. Futsal er både gode trening og kjekt å halda på med, seier Endre etter den spreke sistesøndagen i advent.