Inga tenning på Borgafjellet?
– Nei, det blir ikkje lys på søndag. Etter det som har skjedd med masta er det ikkje sikkert det blir lys i det heile tatt, seier Georg Jørgensen.
Bildeserie:
Kvart år sidan Arne Martin Holen serverte ideen i 1999 har det vore lys i tre lange lenker i masta på Borgafjellet.
Les òg: På lyspatrulje (om historikk og drift)
Mange har gledd seg over dette landemerket, som er synleg for både fly- og ferjetrafikk, enkelte lærer også ungane sine at nissen bur på det sentrumsnære fjellet.
Men denne jula kan bli utan lys.
– Utstyret vårt er fjerna
Georg Jørgensen frå Os Kulturutvikling fortel at det uansett ikkje blir tenning søndag.
– Dei som eig masta har fjerna linene våre. Då dette prosjektet starta var dei hjelpsame og monterte dei opp, sånn at vi kunne heisa lyslenkene. Men då vi var oppe for eit par veker sidan låg dei slengt på bakken.
Jørgensen meiner dette er gjort tidlegare i haust og fortel at ingen har blitt varsla om dette.
Sette kultursjefen på saka
Å montera nye liner er ikkje ei sak for amatørar. Det er dessutan ikkje lov å ta seg til rette på denne masta.
– Vi er heilt avhengige av velvilje frå dei som eig masta. Om det er Telenor eller andre som skal kontaktast er uvisst, men vi får hjelp av Lisbeth Axelsen.
– Det blir uansett ikkje tenning av lysa på søndag, for dei er framleis på bakken. Men vi får håpe at vi får både velvilje og hjelp sånn at vi får tent lysa før jul, seier Georg Jørgensen.