I lufta med Os Travel
Det nystarta reiseselskapet er i gang, både innanlands og utanlands.
Bildeserie:
Vitaltour-gründer Hans Parnefält var oppe i over 65 millionar kroner i omsetnad begge dei siste driftsåra før han i 2012 selte aksjane sine.
I år kom han i drift med nytt reiseselskap, der bordet delvis har snudd, no skal han blant anna tilby reiser til Noreg og i Noreg.
– Eg hadde det du kan kalla ein lang startstrek, der eg frå januar til mars reiste rundt og gjorde meg kjent med ulike tilbydarar i regionen, både innan transport, servering og overnatting. Det var lærerikt og nyttig.
Små og store kundar i Noreg
Frå kontoret i servicebygget ved gjestebrygga, mellom Peppes og Esso, har han selt alt frå billettar til Rødne og Norled sine båtturar til Rosendal og Norheimsund - til ekskursjonar med Fonnafly sine helikopter.
– Ein familie på sju frå Nederland, som skulle til Bergen, ba meg organisera nokre utflukter. Dei hadde frå før booka opphald på Solstrand, og ville sjå meir av Vestlandet.
Rafting på Voss, båttur med Aboard frå Lysefjorden sin Princess V42 - og tur med to helikopter for å sjå Folgefonna og Trolltunga.
– Dei la igjen ein del kroner, men eg kan ikkje rekna med å få sånne kundar kvar dag, seier Hans.
Fire matreiser til Spania
I juni lanserte Os Travel nokre skreddarsydde matreiser til Tarragona, ein hamneby som ligg ein time sør for Barcelona.
To midtvekesturar (måndag-fredag) og to weekendturar (fredag-måndag) blei lagt ut for sal, med fly, overnatting, transport, besøk på vingard og fleire måltid inkludert i pakken.
– Her er salet i gang, og til den første turen er halvparten av billettane selt.
Vaksne par og venninner er dei første kundane. Os Travel er ikkje uroa om ikkje alle billettane blir selte.
– Vi håper naturlegvis på godt sal til alle avgangane, men gjennomfører alle fire turane uansett.
– Dette er uansett noko vi skal driva med i lang tid, og om ikkje selskapet går i pluss totalt sett på desse fire første avgangane, så er vi trygge på at dei som blir med vil få ei god oppleving og bli fine referansar til turane i åra som kjem.