I gang på Kuventræ
Ny kunstgrasbane og nytt friidrettsanlegg med fleire nyvinningar blir truleg klart til fellesferien.
Bildeserie:
Denne veka starta Saltex AS, entreprenøren som fekk oppdraget med å oppgradera Os idrettspark Kuventræ, arbeidet.
Jobben omfattar den 62 år gamle grasbanen, som no skal få kunstgrasdekke og friidrettsanlegget rundt.
Les òg: A-laget droppar grasbanen
– Kontrakten med dei seier at dei skal vera ferdige i løpet av juni.
– Om vêret held seg slik det er i dag, kan det gå enno raskare, fortel Tor Inge Døsen, leiar av prosjektavdelinga i Os kommune.
Nyttar ny metode
Arbeidet dei no har starta på er å fjerna noko av det øvre laget med jord på dagens fotballbane.
– Saltex nyttar ei relativt ny metode kor dei avrettar dagens anlegg.
– Oppå der legg dei ein duk, som drenerar vatnet ned i grøfter og ut av anlegget.
– På toppen legg dei dekket både for fotballbanen og friidrettsanlegget, forklarar Døsen.
Metoden gjer at ein slepp fjerna så mykje masse som med tradisjonelle metoder og dermed held ein kostnadene nede.
Fann på ny løysing
Ei utfordring Døsen og idrettskonsulent Tom Leonsen har hatt i planlegginga av oppgraderinga har vore å sikre at ein kan driva aktivitet både på fotballbanen og på friidrettsanlegget samstundes.
Der meiner ein no ein har funne ei enkel og funksjonell løysing.
– Vi har presentert den for både friidrettskresten og fotballkretsen. Dei har begge bedd oss gå vidare med det, fortalde Døsen, då han presenterte løysinga for årsmøtet i Os Turn tysdag.
Løysinga går enkelt ut på eit fangnett med 3 meter høgde blir satt opp på mobile fester langs fotballbana.
– Det gjer, at skal ein arrangere eit friidrettstemne eller fotballkamp så kan ein i løpet av eit par-tre timar rigga det ned og opp.
– På vanlege treningsdagar med nettet oppe kan då friidrettsfolket og fotballfolket driva sin aktivitet ved sidan av kvarandre, utan å vera i vegen for kvarandre.
Gras på rull
Det nye kastfeltet ved sidan av dagens anlegg tek ein òg sikte på å få ferdig til sommaren.
– Det er eit prosjekt som ikkje entreprentøren skal gjennomføra, men som vi i kommunen styrer.
– Vi kjem til å nytta oss dels av dugnadskrefter frå Os Turn som ligg i avtalen vi har inngått med dei, og dels av eigne krefter.
– Graset, som kjem på ruller frå Jæren, er allereie bestilt og venta levert i mai/juni, avsluttar Døsen.