Høg hammarføring på Øvreeide
Snekring var blant dei mest populære aktivitetane på Kom deg ut-dagen.
Bildeserie:
Å invitera folk utandørs var søndag som å sparka opp opne dører - midt i ein lang periode med fin snø, trygg is og skyfri himmel.
– Vi var spente på responsen, sidan folk frå før har vore mykje ute på ski og skøyter i heimbygda dei siste vekene. Men dei siste dagane rann det inn over 100 påmeldingar, seier Anny Kolbeinsen Briggs frå Os Turlag.
Rundt 60 møtte fram på Øvreeide Gard, der aking, rebusløp, bogeskyting og fuglekassesnekring sto på programmet.
Kjekt å snekra
– Å snekra fuglekasse var veldig populært, og så har jo garden både høns, ender og alpakkaer.
Turlaget stilte med 19 frivillige for å halda gjestane i aktivitet, og for å grilla pølser på bålpanner.
– Grunna smittevernreglane trengte vi ekstra mannskap, bogane måtte vaskast av etterkvart som nye skulle skyta, og dei som ville ha ketchup på hotdogen kunne ikkje forsyna seg sjølv.
På båttur neste gong?
Det var kaldt i Hegglandsdalen søndag, ned mot 17 minus, men Øvreeide Gard har eit stort telt som folk kunne varma seg i.
– Trass godt oppmøte var det aldri trangt om plassen. Vi fekk ein kald, men veldig fin Kom deg ut-dag.
Neste Kom deg ut-dag er første søndag i september.
– Dei siste åra har vi vore på Lysøen i september. I fjor måtte vi dessverre avlysa grunna pandemien. Om vi får til ein tur på Lysøen i september i år, blir det jo stas å få testa den nye båten museet har fått.
(Sjå fleire bilde under - synleg for pålogga abonnentar)