Historisk budsjettsamarbeid
Fremskrittspartiet, Høgre, Kristleg Folkeparti og Venstre legg fram felles budsjett for Os kommune. I formannskapet fekk dei støtte frå Tverrpolitisk samlingsliste.
Det var med historisk sus ordførar Terje Søviknes (Frp) presenterte budsjettframlegget på vegene av budsjettkameratane i Fremskrittspartiet, Høgre, Kristleg Folkeparti og Venstre i formannskapet tysdag. Tidlegare har Frp og Høgre vore aleine om samarbeidet.
På toppen av det heile valde Eirik Neverdal i Tverrpolitisk samlingsliste å støtta framlegget i staden for å koma med eit eige.
– Vårt hovedfokus er veldig likt firerbanden sitt. Det å leggja fram eit eige budsjett blir difor feil for oss. Eg synes dette er eit godt budsjett.
– Vi støttar difor framlegget, men melder at vi kanskje kjem med eit par verbalforslag.
– Eg veit ikkje kven som fortener skryten av dei fire, men det er gjort eindel gode grep her, roste Neverdal.
Var så stor semde
Av dei to minste partia (KrF og V) er det berre venstre som er representert i formannskapet.
– Det er ein litt anna modell enn dei tidlegare åra.
– Bakgrunnen for at vi gjekk inn i samarbeidet var at det var såpass stor semde om budsjettet i fjor at det var i grenseland å leggja fram eit eige budsjett.
– Enn så gøy det er å sittja på sidelinja og driva markeringspolitikk, så var det rett å gå i diskusjon med dei andre partia.
– Når vi i tillegg blei invitert med i prosessen på eit så tidleg tidspunkt at vi òg har hatt ei reell påverking av resultatet, så tykkjer eg vi har klart å hamra ut nokre veldig gode løysingar, påpeikte Jon Sivert Rykkel (V).
Gode diskusjonar
Varaordførar Marie Elisabeth Lunde Bruarøy (H) var nøgd med å få med dei to sentrumspartia i budsjettprosessen.
– Det har vore ein kjekk budsjettprosess med gode diskusjonar.
– Dette er eit fellesframlegg frå alle fire partia, og det er ingen av oss som skal ta æra for enkelt saker i framlegget.
– Vi har trange rammer i kommunen og heile organisasjonen er pressa, men samstundes er vi i den heldige situasjonen at vi ikkje treng kutta i budsjetta.
– Eg er glad vi har fått satt av 2 millionar til prosjekt betre læringsresultat. Vi skulle gjerne ønskt å gitt meir, men kako er ikkje større, oppsummerte Bruarøy.