Her opnar snooker- og biljardsalong

Bildeserie:

Full skjerm

1 av 3

Måndag 3. september 2012 blei Hans Olav Sundøy sin siste kveld på Os Biljard og Sportsbar. Lokalet blei overtatt av andre drivarar, som også kjøpte delar av utstyret til Sundøy, og leigde inn førre eigar som arbeidskraft i periodar. Men i desember i fjor måtte desse kasta inn handkledet.

Os Biljardklubb blei stifta i 1984, tre år etter at Norges Biljardforbund blei stifta, og er truleg landets eldste.

Les òg: 25 år med biljard

Klubben, som har fostra fleire noregsmeistrar, blei starta hos Sundøy og har hatt biljardsalongen, og seinare sportsbaren, som treningsarena heile vegen.

– Vi skulle ha feira 30-årsdagen til klubben med fest i salongen i desember 2014, men så blei sportsbaren stengt, fortel formann gjennom mange år, Jan Helge Kordts.

Kordts, som blant anna har spelt to sesongar i norsk eliteserie og for eit par år sidan tok NM-sølv i veteranklassen, er ein av medlemmane som framleis er aktiv i konkurransar.

Les òg: Biljardklubb i støtet

Denne veka signerte klubben leigeavtale på eit 300 kvadratmeter stort lokale.

Snooker og biljard

Lokalet Os Biljardklubb har skaffa seg ligg som frittstånde del av Ulvenparken, bak den store glasfasaden der NDM leiger toppetasjen.

– Vi har to biljardbord frå før og kjøper to nye. I tillegg kjøper vi fire heilt nye snookerbord, seier Reidar Rundsveen.

Den tidlegare juniornoregsmeisteren i biljard er no aktiv innan snooker, der han no ligg på 3. plass i noregscupen. 27 år etter at han blei juniornoregsmeister i biljard er han rangert som beste veteran i snokker, eitt år etter at han byrja å konkurrera i den noko vanskelegare formen for «kulespel».

– Vi kjem kanskje til å justera på namnet til klubben, at vi får snooker med i namnet. Snookerinteressa er veksande i Noreg, men i bergensområdet er det så vidt eg kjenner til berre eitt kommersielt tilgjengeleg snookerbord å spela på.

– Blir drive av og som eit idrettslag

Den nye salongen blir eit reint klubblokale.

– Sportsbaren var ein fin plass, men her blir det ikkje storskjerm eller skjenkeløyve, det blir ein idrettsarena, seier Kordts.

– Eg trur det kan vera ein fordel for rekruttering av ungdom, seier han om klubben som i periodar har hatt over hundre juniormedlemmar.

Tanken er å dela ut nøklar eller få et låssystem så medlemmar kan låsa seg inn og spela når det passar.

– Her blir ingen tilsette, berre ei husleige som vi med medlemsavgift spleisar på, seier Rundsveen.

I fjor hadde klubben rundt 30-40 medlemmar. Rundsveen håper talet er oppe i rundt 25 aktive på denne tida neste år.

Sundøy ser fram til opning

Også Hans Olav Sundøy er med blant eldsjelene i klubben som no går inn for å leiga lokale.

– Eg gler meg veldig over at det framleis er liv i klubben og at vi har fått eit godt eigna lokale.

– Borda kjem over ferien og vi håper å vera på plass i lokalet i løpet av september. Tidlegare medlemmar som er interesserte i å vera med og spela igjen er naturlegvis velkomne til å ta kontakt med oss, seier Sundøy.

I verdsklasse: Førre helg fekk Sundøy og Rundsveen snooker-undervising av Kurt Maflin, ein av dei beste snookerspelarane i verda.