Her kjem gründerparken
Bjørnefjorden Gründerpark opnar 9. februar. – Ei meir inspirerande utsikt finn du knapt, meiner næringssjefen.
Bildeserie:
I starten av januar fortalde næringssjef Daniel Skotheim at lokalet til Bjørnefjorden Gründerpark var klart, men at han ikkje ville gå ut med detaljane riktig enno.
– Lokalet er 370 kvadratmeter med kontor, kjøkken, møterom, stillerom og godt med skapplass i andre etasjen over Sparebanken Vest. Vi kjøpte all innreiing frå Amesto då dei flytta ut, så no skal vi berre flytte litt om på det, slik at det blir meir ope, fortel Skotheim når han tek Midtsiden med på omvisning i lokala til gründerparken.
Åtte har tatt kontakt
9. februar opnar gründerparken med offisiell opning klokka 9 og ope hus frå klokka 10.
– Det gler eg meg veldig til. Med denne utsikta kan ein jo ikkje bli anna enn inspirert.
– Men korleis har reaksjonane vore etter at de lanserte ideen?
– Den har vore svært god. Eg har hatt kontakt med åtte gründarar, som eg skal ha vidare møte med og som eg håper vi får inn her. Eit prosjekt som dette er avhengig av nettverkseffekten, slik at det brer om seg.
– Slik lokalet står no, så har vi plass til 20, men når vi gjer om på det vil det vera god plass til enno fleire.
Varierte bransjer
På spørsmål røper Skotheim at gründerane han har vore i kontakt med kjem for forskjellige bransjer.
– Det er nokre frå IT-bransjen, som jobbar med app-utvikling, det salg og service inn mot offshore-bransjen, det er rådgivning og grafisk produksjon.
– Sjølv om dei kjem frå forskjellige bransjar, så trur eg dei vil treffe på mange av dei same utfordringane i starten, og vil kunne ha godt utbytte av å sitta i same lokale.
– I tillegg vil det vera mogleg for pendlarar som gjerne har heimekontor nokre dagar i veka til å leie seg inn her, slik at dei får eit kontorfellesskap også når dei ikkje er på sin faste arbeidsplass, forklarar Skotheim som sjølv vil arbeida frå lokalet nokre dagar i veka.