Her er årets fridagar
Langhelg etter langhelg: 2013 har tidleg påske, himmelfartsdag før konfirmasjonshelga og 17. mai på ein fredag - i pinsehelga.
Vi har i dag kome til 2013 og det er 100 år sidan Canberra blei hovudstad i Australia, Panamakanalen blei fullført, Mary Phelps Jacob fekk patent på BH-en, Gideon Sundbäck oppfant glidelåsen og Stortinget vedtok samrøystes allmenn stemmerett for kvinner.
Richard Nixon, Muddy Waters, Willy Brandt og Jimmy Hoffa (om dei hadde funne han) ville blitt 100 år i år, om dei framleis levde.
Det er i år 50 år sidan Martin Luther King jr. heldt sin berømte tale «I Have a Dream» og 50 år sidan John F. Kennedy blei skoten og drept. Det er også 50 år sidan den første James Bond-filmen Dr. No hadde noregspremiere på Eldorado kino.
Quentin Tarantino, Seal, Michael Jordan, Mike Myers, Joey Tempest, Arne Hjeltnes og Brad Pitt fyller 50 år i år.
Men når det kjem til årstal er du kanskje like interessert i året i år?
Du lurer kanskje på kor tid det er vinterferie, påske og pinse i år? Og kva dag kjem 17. mai på?
• Siste skuledag før vinterferien er fredag 22. februar, første skuledag etter vinterferien er måndag 4. mars.
• Siste skuledag før påskeferien er ein månad seinare, 22. mars. Skjærtorsdag er torsdag 28. mars og første skuledag etter påskeferien blir tysdag 2. april.
I mai blir det som vanleg mange fridagar, og i år med ei ekstra lang langhelg.
Først er det kristi himmelfartsdag torsdag 9. mai og skulefri fredag 10. mai.
Så kjem den ekstra lange langhelga, helga etter, for 17. mai er nemleg på ein fredag i år, og same helg som pinsen.
Dermed blir det fri både fredag og måndag denne helga, sidan 20. mai er 2. pinsedag.
Så blir det ein samanhengande månad utan fridagar, for siste skuledag før sommarferien blir, i alle fall ved barneskulane, torsdag 20. juni.
St Hans er måndag 24. juni, sankthansaftan kvelden før, søndag 23. juni.
Hausten har ikkje så mange fridagar. Siste skuledag før haustferien blir fredag 4. oktober.
Julaftan (og nyttårsaftan) kjem på ein tysdag i år, så det blir fri både onsdag 25. desember, torsdag 26. desember og onsdag 1. januar, noko som skaper fleire inneklemte dager og, for mange, heile to veker med juleferie.