Held Lysekloster som storfavoritt
– Heilt grei odds, meiner Lysekloster-trenar Thomas Sandal før NM-oppgjeret på Kuventræ onsdag.
Bildeserie:
Etter 2015 i kvar si avdeling er det onsdag for eit derby av dei store; Os tar imot Lysekloster på Kuventræ.
Lysekloster er i divisjonen over, men Os hadde ein nesten like god haust i 3. divisjon.
5 derby på 2 år
Lysekloster sitt A-lag har aldri slått Os sitt A-lag. Dei to laga møtte kvarandre til saman fem gongar i 2013 og 2014.
I 2013 blei det 3-0 til Os på Kuventræ. Borte leia Os 0-2, men kampen enda 2-2.
I 2014 vann Os 3-1 i NM, begge serierundane enda uavgjort, 3-3 på Kuventræ (etter at Os leia 3-1) og 2-2 i Lysekloster idrettspark.
Har Lysekloster som favoritt
– Vi synest det er naturleg med Lysekloster som favoritt, men dette er eit av dei mest spennande og jamne lokaloppgjera i 1. runde og det blir absolutt ikkje enkelt for Lysekloster, seier oddssetjar Daniel Vasbund frå NordicBet.
– Men på ein normal dag vinn 2. divisjonslaget med eitt eller to.
Her er oddsen på NM-kampen Os - Lysekloster:
3.15 på Os
4.80 på uavgjort
1.70 på Lysekloster
Trivst med favorittstempelet
Lysekloster-trenar Thomas Sandal synest oddsen er grei.
– Historisk sett blir det jamt og tøft, men vi er ein divisjon høgare og kjem til Kuventræ for å vinna.
– Kva blir avgjerande i dette lokaloppgjeret?
– At vi er kald nok når det kokar. Det vil bli mykje vilje og mykje kriging, då gjeld det å halda konsentrasjonen og tempoet oppe.
– Kan dette bli eit spiss-spørsmål?
– Ja. Å setja sjansane er avgjerande. Eg håper det blir nok fart i kampen til at ikkje det berre blir kriging og tilfeldigheiter.
– Korleis ser stallen ut?
– Vi har litt smurusk her og der, men det ser ut til at vi kan ha alle disponible til kampen onsdag.
– Svensken spelte ikkje i serieopninga, er Petrit Zhubi klar til kamp?
– Vi har gode nordmenn og vi, mendet er godt mogleg at han får vist seg i NM-runden, seier Sandal.
Midtsiden kjem tilbake med kommentarar frå Os-leiren og korleis dei førebur seg på storinnrykk.