Heimturen stoppa med eit brak
Siri og Bård frå Os var om bord då «Gloppen» knuste inn i ferjekaien på Skjersholmane.
– Eg såg at det kom til å gå gale, så eg sette meg inn i bilen og sto på bremsen før ferja smelte i kaien, fortel Bård Nævdal.
Han, kona Siri og yngstemann på tre år var på veg heim til Os frå Halsnøy då ferja MF «Gloppen» frå Ranavik knuste i kaien på Skjersholmane, søraust på Stord.
– Farten var redusert, men det var ikkje teikn til bakking. Mannskapet på dekk oppdaga det òg, dei tok spenntak før kollisjonen.
Uhellet skjedde i 12.30-tida. Ingen bilar eller passasjerar skal vera skadd.
– Ferja bakka ut, men kunne ikkje gjera eit nytt forsøk på å setja oss i land for lemmen på land ramla i sjøen då ferja byrja å bakka, fortel Nævdal.
– Truleg menneskeleg svikt
«Gloppen» gjekk til Valevåg i Sveio og sette bilane i land. Her gjekk bakkinga heilt fint.
- Det er for tidleg å seia noko om årsaka, men mykje tyder på at det er menneskeleg svikt, seier regionssjef for ferjer i Norled, Inge Andre Utåker, til BT.no.
Ei reserveferje er på veg frå Stavanger, og sidan det er to ferjeleie på Skjersholmande vil sambandet koma i rute igjen frå måndag.
I mellomtida håper Siri og Bård at dei rekk middagsbesøket på Os, med ein sovande treåring i bilen.
– Kollisjonen gjorde inntrykk, han prata som ein foss heilt til han sovna, seier Bård og ler.