Har signert spelar frå OBOS-ligaen

Lysekloster har styrka stallen med Monir Benmoussa (24), som går frå Florø og har hatt si første trening i Lysefjorden.

– Han blei skadd i fjor haust, men er no tilbake, og var på jakt etter ein passande klubb å spela seg opp igjen i, seier sportsleg leiar i Lysekloster, Svein Kollen.

Monir rakk å spela 25 kampar og å skåra 6 mål for Florø i fjor. Florø kom på 8. plass.

Etter medisinsk sjekk på Brann Stadion blei det kontrakt med Lysekloster ut året.

Debuterte på Vålerenga som 18-åring

Monir har vakse opp på Holmlia og gjekk til Vålerenga i 2011.

I 2013 debuterte han på A-laget, der han fekk tre kampar, ved sidan av G19 og Vålerenga 2 i Oddsen-ligaen.

Seinare har han spelt i OBOS-ligaen, for Bærum og Fredrikstad, før han i fjor var ny på Florø.

– Monir er ein offensiv spelar som kan brukast i heile angrepsrekka, men som vi i utgangspunktet har tiltenkt i 10-ar-rolle, seier Kollen.

I førre veke signerte Lysekloster Willy Zamble frå Brattvåg. Zamble spelte frå start i toppkampen laurdag (3-3 mot Viking 2).