Har signert ny spelar og ny assistenttrenar
Dessutan har ein storskårar stadfesta at ho er med også neste sesong.
Etter endt sesong i vår blei det kjent at Trond Budal gir seg som trenar for damelaget, for damene sin del, og blir med som Ole Jørgen Olsen sin assistent på jenter 15-laget.
I midten av mai var Emil Andreas Fjær engasjert som ny hovudtrenar.
No opplyser Os Handball at også ny assistenttrenar og ein ny spelar er klar for 2022-2023-sesongen.
Runar Walaker blir Fjær sin assistent. Han er frå Stryn, og jobbar som lærar i Bergen.
Emma Yael Husebye blir ny spelar i Os sin dametropp. Ho har fartstid i Bønes, og har flytta med familien til Os.
Toppskårar klar for ny sesong
Os Handball kan også fortelja at Amanda Kristin Holthe er klar for 2022-2023-sesongen.
Før førre sesong var det usikkert om ho fekk tid å vera med, og var ikkje del av dei 15 då vi presenterte stallen før sesongstart (med 13 av 15 som debutantar).
No ligg ho an til å få med seg både oppkøyring og spel.
Amanda står loggført med 80 mål (71 spelemål + 9 frå 7 meter) på 13 kampar i fjor, og blei toppskårar framfor Ayleen Akyüz Hagen, som skåra 70 på 14 kampar.
