Har signert for to år til

I november 2016 blei Ruben Hetlevik presentert som ny trenar for Lysekloster. Klubben signerte toårskontrakt med opsjon på to år til. No er opsjonen løyst ut.

– Vi er nøgde med reforhandlingane, og at vi har fått Ruben med oss vidare. Han er veldig dedikert, han er godt likt i gruppa og han er veldig god på spelarlogistikk, seier sportsleg leiar Svein Kollen.

Den ambisiøse klubben har mål om comeback i 2. divisjon. Under Hetlevik har det blitt nesten i to sesongar på rad.

– Også resultatmessig har Ruben gjort det bra. 3. divisjon har blitt tøffare og kampen i toppen er knallhard, seier Kollen.

– Naturleg at eg blir evaluert

At mange i klubben har ein offensiv tankegang, og at det blir stilt krav til resultat, har ikkje Hetlevik problem med å leva med.

I fjor landa Lysekloster på 2. plass, a poeng med opprykkslaget Brattvåg. I år blei det 3. plass.

– Eg har tett dialog med leiinga i klubben gjennom sesongen. Det er naturleg at eg blir evaluert, men eg trur òg at dei har respekt for kor små marginane er i toppen, seier Ruben.

– På desse to åra har vi spelt 52 kampar. Av desse er det berre éin av dei som ikkje har betydd noko. Vi er vant med presset på å prestera.

Eit ønskje om mindre utskifting

Hetlevik synest det var godt å få kontrakten i boks.

– Det var ikkje vanskeleg å bli einige. No kan eg halda fram med dialog med spelarar for å få stallen på plass til 2019-sesongen.

Lysekloster mister blant anna Willy Zamble og Monir Benmoussa, som var på kontrakt ut året. Årets toppskårar, Vladan Radojkic, ser ut til å vera på veg til ein OBOS-klubb, ifølgje Kollen.

– Vi har fleire ungdomar på kontrakt, dei fleste andre hadde kontrakt ut året. Denis Ljubovic er ein av få som er sikre kort for 2019, men det er fleire vi ønskjer å ha med vidare, seier Ruben.

Han har forståing for at det blir ein viss sirkulasjon på dette nivået, men det er ikkje eit ønskje.

– Skal du kjempa om opprykk så krev det at du er seriøs i alt du gjer, frå kosthald til kvile og treningsmengde. For spelarar på dette nivået kan situasjonen endra seg raskt, anten det handlar om jobb, studier eller det å stifta familie.

– Desse to sesongane eg har vore i Lysekloster, har vi hatt ganske stor utskifting kvart halvår. Det kan ha kosta oss nokre poeng, og er noko vi vil jobba for å betra.

Resten av trenarteamet skal no setjast saman.