– Har lært mykje

Rett før nyttår fekk Bjarte Andersen og Catten den endelege ferdigattesten for nattklubben på Osøyro. Fram dit har det vore ein lang prossess.

I fjor vinter kjøpte Andersen nattklubben, som då heitte Irish Cat, frå Espen Risti og Frode Hølleland. Med på kjøpet fekk Andersen nokre utfordringar han gjerne skulle vore uten, med krav om bruksendring, betre brannsikring, ventilasjon og støydemping.

– Det siste året har vore eit mareritt på godt og vondt.

– Det å aldri vita kva neste dag bringer har vore heilt jæ..... Samstundes har eg lært utruleg mykje, eg tenker heilt annerleis no enn tidlegare. Det held ikkje med å tru at ting er i orden, det må dokumenterast, fortel Andersen.

– Følte du nokon gong at du kjøpte katta i sekken?

– No gjer eg ikkje det, men hadde du spørt meg for ein månad sidan kan det vera at svaret hadde vore eit anna, smiler nattklubbeigaren.

– Innimellom har det føltes som om eg har blitt kasta ut for eit fjell med ein fallskjerm på ryggen, men utan instruksjon om korleis den fungerte. Det måtte eg berre finne ut før eg smalt i bakken.

Tapte 6-800 000

I slutten av juni i fjor fekk nattklubben stengingsordre på grunn av manglande branntryggleik i høve rømningsvegar og branndørar.

– Det var tøft. 8 veker stengt i det som er av den beste sesongen var ikkje lett.

– Vi tapte nok mellom 6 og 800 000 i omsetning dei vekene. I tillegg skulle vi sørgje for å utbetre dei manglande brannvesenet hadde peika på og dei krava kommunen og arbeidstilsynet hadde kome med.

– Eg har vore nøydd til å gå mange rundar med leverandørane mine for å be om godt vêr, men dei har vore greie og vi har klart å komma oss igjennom det.

– Men kvifor hamna du i den situasjonen? Er ikkje regla og krava klare?

– Jo det er dei nok. Problemet var at eg hadde rådgjevarar som gav fortalde meg kva eg måtte gjera. Når eg hadde gjort det og kommunen kom på kontroll så viste det seg at det ikkje var godt nok.

– Det var ikkje ei god oppleving. Det virka jo som om eg prøvde å lure meg unna med enklare løysingar, men det gjorde eg altså ikkje. Etterkvart blei det litt sånn. Gjer det som må gjerast, drit i resten. Eg skal finne midlar som trengs.

– Korleis klarte du det, då nattklubben var stengt og de ikkje hadde inntekter?

– Vi har vore nøydde til å pantsetta hus og heim for å få det til. Regningane måtte jo betalast, men no er vi i mål, så herfrå går det berre oppover, smiler Andersen, som fortel at det totalt har kosta rundt 1,5 millionar kroner å få på plass tilfredsstillande løysingar.

Samler trådane

Med godkjenninga på plass er Andersen klar for å sjå framover.

– No samlar vi trådane og kan endeleg gjera det vi har lyst til, nemleg å driva nattklubb.

– Vi kjem til å endra navnet til Catten Nightclub for å tydeleggjera kva vi eigentleg er, men det har vist seg å ikkje vera heilt enkelt i dei sosiale mediene. På facebook til dømes har vi måtte søkje om å få endra navnet på sida vår frå Irish Cat til Catten Nightclub, noko som har vist seg å ta noko tid.

– Ellers så kjem vi til å sjå korleis vi kan få fleire til koma ut også på fredager. Dei er jo heilt daude her på Os. Quizane på torsdagane skal vi videreutvikla og på laurdagskveldane skal vi klare å skapa godstemning.

– Eg gler meg til å endeleg kunne fokusera på å skape gode opplevingar for gjestene og ikkje på kor ventilasjonsrøyr og sprinkelanlegg skal vera, avsluttar Bjarte Andersen.