– Har ein snakka med tomteeigarane?

Eit samstemt plan og bygningsutval gjekk torsdag inn for at ein kunne starta arbeidet med å detaljregulera ein elvepromenade langs Oselva frå Buggegarden til Pedersenbygget i Landboden. Dette gjer at ein vil kunne få ein samanhengande gangveg frå gamlebrua til nyebrua.

Men vedtaket kom ikkje utan at politikarane hadde stilt spørsmålsteikn med kvifor grensene gjekk der dei gjekk, og om dei berørte grunneigarane var varsla.

– Eg tykkjer det er litt tynt det vi har fått frå plankonsulentane.

– Kvifor går grensene der dei går, det må vera ein tanke bak det. Difor burde det vore betre informasjon, både til oss politikarar, men ikkje minst til innbyggjarane og grunneigarane slik at ein unngår spekulasjoner, kommenterte Terje Sperrevik (TvS).

Kan ikkje varsla før varselet kjem

Han fekk umiddelbar støtte frå Gustav Bahus (Frp).

– Vi diskuterte akkurat det same på vårt gruppemøte. Kvifor går grensa midt inne på eigedommane til dei tre grunneigarane i Landboden og er dei informert om det?

Frå administrasjonen fekk politikarane det same svaret som tidlegare om at ein tek i litt ekstra når ein sett grensene, slik at plangrensene ikkje låser for gode løysingar. Når det gjaldt varsling av berørte partar påpeika plansjef Aina Tjosås at saka politikarane sat med handla om varsel om oppstart av planarbeidet.

– Vi kan ikkje sende eit brev om at vi har tenkt å sende eit brev, kommenterte ho tørt.

Politikarane såg det poenget, men var likevel ikkje heilt nøgd med svaret.

– Brevet kunne iallefall vore sendt før dette møtet, meinte Ståle Skaatun (H).

Kva med parkeringa?

Ingrid Netland (Sp) undra kva som ville skje med parkeringsplassen mellom det gamle bankbygget og Oshjørnet.

– Er ikkje tomta 55/3 bunden opp til parkering for Oshjørnet?

– Enn så lenge kan dei parkera der, men når vi har bestemt oss så må dei inn i parkeringshus eller inn under frikjøpsordninga som gjeld ellers i sentrum, svara Tjosås.

– Kordan skal vi då forholde oss til parkering i sentrum når vi byggjer byparken.

– Eg får følelsen av litt "vi får sjå kva som skjer"-haldning. Om vi ikkje tek grep, så får vi inga styring på dette, argumenterte Netland, som fekk støtte frå Harald Døsen (Ap).