Har du fått med alt?

– Førehandsutfylt betyr ikkje ferdigutfylt! Det er viktig å understreke at sjølvmeldinga du har fått berre gir ei foreløpig oversikt på om du får igjen på skatten eller restskatt. Ligg du for eksempel an til å få restskatt, er det likevel mogleg å gå i pluss: sjekk at opplysningane i sjølvmeldinga stemmer, slik at du ikkje betaler for mykje skatt, seier Erlend Thowsen, seksjonssjef på avdeling for rettleiing i Skatt vest i ei pressemelding.

Er alle frådraga med?

Det kan òg vere frådrag du kan ha krav på som ikkje er ført opp. Reisefrådrag og sjukdomsutgifter er typiske eksempel på slike frådrag.

–Bruk den halvtimen det tar å sjekke sjølvmeldinga og sjekk ut dei digitale kalkulatorane vi har på skatteetaten.no: frådragsvegvisar, vegvisaren til sjølvmeldinga og pendlarfrådragskalkulatoren, rår Thowsen.

– Viss du til dømes refinansierte lånet ditt i 2015 er dette noko du kan få frådrag for i post 3.3.1 Gjeldsrenter. Dette frådraget gjeld blant anna for alle som har hatt omkostningar ved opptak av lån (inkludert etableringsgebyr), eller finansieringsomkostningar i forbindelse med konvertering av lån for å få lågare rente, òg kostnader til takstmann.

– Sjølv om sjølvmeldinga blir stadig enklare, er det like viktig som før å sjekke at dei førehandsutfylte opplysningane stemmer og er fullstendige, understrekar seksjonssjefen.

– Du treng ikkje å sende inn dokumentasjon til sjølvmeldinga – vi spør når vi har behov for meir dokumentasjon og informasjon frå deg. Viss du må levere kan du levere elektronisk. Gjer du det og finn feil eller frådrag som manglar, kan du gjere endringar elektronisk heilt fram til fristen for levering den 30. april.

Er du lønnstakar eller pensjonist og du ikkje har endringar i sjølvmeldinga, alle opplysningane stemmer og alt er med? Då treng du ikkje gjera noko meir.