Har booka seks treningskampar
Dette er motstandarane Os skal ha i vinter. I dag startar oppkøyringa.
– Om dei har følgt planen så er dei i god form når dei møter til trening i dag, seier spelande hovudtrenar, Hassan El Fakiri.
Os heldt fram med trening etter serieslutt og venta med ferie til slutten av november. Fram til i dag har dei trent for seg sjølv, med nokre frivillige fellesøkter innandørs, i ein dryg månad.
– No startar vi med fire fellesøkter i veka. I tillegg blir det nokre treningshelger og ein del treningskampar før vi skal på leir.
Tilbake til Kypros
A-laget skal på treningsleir til Kypros, der dei hadde eit vellykka opphald i fjor.
Treningsleiren blir frå 15. til 23. mars.
Meir variert motstand
Før treningsleiren skal Os spela seks treningskampar.
I fjor var fire av fem treningskampar mot lag frå 1. og 2. divisjon. Os tapte 0-7 for Nest-Sotra, 2-4 for Fana (leia 2-1), 2-3 for Odda (leia 2-0) og spelte 1-1 mot Fyllingsdalen.
– I år har vi prøvd å få meir variert motstand, at nokre av laga er på nivået vi møter i serien, seier Hassan.
– Eg ventar samtidig meir av gutane i denne oppkøyringa. Dei er betre kjent med spelestilen og skal gjera det endå skarpare i kamp.
Her er motstandarane med speledato:
16/1 Bjarg - Os (også motstandar i årets serie)
23/1 Tertnes - Os (også motstandar i årets serie)
6/2 Brann 2 - Os (også motstandar i årets serie)
13/2 Fyllingsdalen - Os
20/2 Odda - Os
4/3 Os - Nest-Sotra
– Det har gått greit å få avtalar om treningskamp. Vi kunne spelt endå fleire, men har måtta takka nei til eit par stykker.
– At mange av treningskampane er på bortebane er tilfeldig, seier El Fakiri.
Her er Os si avdeling, med odds, i 2016 (terminlista er ikkje komen).
Midtsiden samleside: Os herrefotball