Har auka med 100 %

1. august 2016 starta Silja Døsen Moberg for seg sjølv, etter mange år som souschef på Solstrand Hotel og Bad. No har ho henta ein tidlegare kollega til å koka saman med seg.

– Det er faktisk andre gong Silja «headhuntar» meg, fortel Ingrid Bjaadal, som starta i Osøyro Kolonial måndag denne veka.

– Vi møttest på babysong i Fjellheim. Eg var då i permisjon og Silja lurte på kva eg driv med. Då eg fortalte at eg var kokk, jente og snakka norsk, var ho ikkje sein om å tilsetja meg på Solstrand.

– Det kunne jo ikkje bli betre enn det, skyt Døsen Moberg inn og ler.

Trivst i lag

Og nettopp latter blir det mykje av når dei to jobbar saman. Bjaadal har jobba gjennom ISS og Adecco som kantineleiar på fleire større arbeidsplassar. Etter Solstrand har ho vore på Fusa.

– Eg kuppa ho frå Framo på Fusa. Då eg byrja å leita etter nokon å jobba saman med, så var det viktig for meg å finna nokon som eg visste ville fungera. Eg trengde nokon eg visste kva sto for, og som kjente meg og korleis eg blir når det kokar som mest. Ingrid har hjelpt meg litt tidlegare, og eg blei særs glad då ho takka ja.

– Vi er like glade i å prate og le begge to, seier Døsen Moberg, som ikkje legg skjul på at det har vore litt keisamt å vera åleine på kjøkkenet.

– Dette som er gøy

Bjaadal deler nettopp den oppfatninga.

– Det er jo dette som er gøy. Å jobba saman og ikkje minst å få vera med Silja på konseptet med lokale råvarer frå småskalaprodusenter, og ikkje minst dei reine smakene. Her kan vi snakka direkte med bonden og verkeleg stå inne for produktet. Det er ærleg mat, som vi veit kva inneheld, forklarer Bjaadal.

– Dessuten trur eg du handsamar råvarene annleis når du har møtt bonden. Du bruker alt på dyret og kastar ikkje noko, når du veit at det kjem frå Moberg eller Bø, skyt Døsen Moberg inn.

– Eg trur kanskje bonden også behandlar dyra sine endå litt betre, når dei veit kor maten ender, fullfører Bjaadal.

At dei to har jobba tett saman før er tydeleg. Dei fullfører setningene for kvarandre og skjønner kva den andre snakkar om før det er sagt.

Bjørnefjorden matkultur viktig

Døsen Moberg fortel at det første halvanna året som sjølvstendig kokk har gått veldig bra, men at det har vore veldig travelt.

– Eg har ikkje hatt særleg tid til å koma vidare og planlegga nye ting. Det håper eg vi skal få tid til no når vi har blitt to. Det har vore ei bratt læringskurve, men utruleg kjekt.

– I tillegg til å møte kundane på ein heilt anna måte enn du gjer når du står på eit hotell- eller restaurantkjøken, så har Bjørnefjorden matkultur (BFM) betydd mykje. Der har har eg knytt kontaktar, både med lokale produsentar og med andre kokkar. Ta til dømes Siw (Bugge Gjerdevik Kolstad, journ mrk) som eg skal halda barnekokkekurs med.

– Ho og eg fann kvarandre gjennom BFM. Gjennom BFM trur eg vi kan gjera kvarandre gode og at vi framsnakka kvarandre. Sjølv om vi driv med det same, så er vi meir supplerande til kvarandre enn konkurrentar.

– Vi gjer ting på vår måte, andre på sin måte. Det er gøy, avsluttar dei to med eit smil.