Håper å samla 200.000 kubikk i Os på onsdag
I fjor hadde Bjørnafjorden Motorsykkelklubb nærmare 170 motorsyklar på treff - på onsdag er det klart ny samling i Vognhallen og cruising i bygda.
Bildeserie:
Even Hjertaas frå Bjørnafjorden motorsykkelklubb fortel at fjorårets treff vart ein stor suksess, og dette har klubben lyst å gjenskapa.
- Vi trudde det skulle koma 50-60 syklar, men så vart jo responsen enorm, og det dukka opp nærmare 170 syklar.
– No går vi rett og slett for å gjenskapa det fantastiske treffet vi hadde i fjor.
Ope for alle - med eller utan sykkel
Hjertaas fortel at treffet startar med samling i Vognhallen før det vert ein stor felles tur for alle syklane gjennom bygda.
– I Vognhallen kan du treffa andre som har motorsykkel, og har du ikkje motorsykkel er du like velkomen. Her er det lov å drøyma seg vekk eller få inspirasjon om du lurar på å starta med sykkel sjølv.
– Det blir sal av mat, kaffi og kald drikke i lokalet inst i Vognhallen. Det var ikkje alle som fekk dette med seg i fjor, men vi har altså ein liten kiosk på staden.
Sjølve køyreturen (cruisinga) vil gå frå Os sentrum opp til Uno-X, Halhjemsvegen, vidare til Nore Neset, Industrivegen og endar opp på parkeringa ved Meny.
Arrangørane har rekna litt på det, og truleg var det over 190.000 kubikk motor samla på treffet i fjor.
– Målet er å passera 200.000 kubikk i år - det vert det ei tøff kortesje av, avsluttar Hjertaas.