Hans Vindenes gjer comeback i nytt parti

Torsdag kveld hadde Bjørnafjorden Høgre nominasjonsmøte, her ser du lista over alle 41 kandidatane.

På lista ser vi at 2 av dagens 4 høgrerepresentantar i kommunestyret i Os, Emil Tetlie Brimsholm og May Brit Haringstad, er plasserte ute av lista og lengre nede på lista.

– Emil vil stå på fylkestinglista, men ønskjer etter åtte år å ta pause lokalt i Os. May Brit hadde sjølv ønskje om å stå lengre nede på lista, seier leiar i Bjørnafjorden Høgre, Susanne Sperrevik.

Børge Lunde måtte gå av som varaordførar då han i 2010 blei tilsett som rektor på Nore Neset barneskule. Før førre val var det klart at rektorar no har fleire ledd mellom seg og rådmann, og fint kan ta på seg sentrale, lokalpolitiske verv. Lunde fekk nest flest personstemmer ved førre val, men Brimsholm fekk flest stemmer frå folk som stemmer andre parti enn Høgre, og gjekk forbi.

– Høgre si gruppe har vore svært stabil i denne perioden, så det har ikkje blitt travelt å vera vara, seier Børge.

Han sit som første vara, og er på 6. plass på ny liste. No gler han seg over å få ein erfaren ordførar frå Fusa med på laget.

– Hans Vindenes sit på lang erfaring og mykje kunnskap. Han kan bli ein viktig person både for Bjørnafjorden Høgre og for Bjørnafjorden kommune, seier Lunde.

Skifta parti

Det som kanskje er mest spennande på Høgre si nye liste er at tidlegare ordførar Hans S. Vindenes (fødd i 1952) har skifta parti.

Vindenes var ordførar i Fusa frå 2003 til 2015, og har no hatt fire år pause frå politikken.

– Eg har orientert Senterpartiet lokalt, men vil førebels ikkje seia så mykje meir om partiskiftet enn at eg tvilte meg fram til eit ja då eg blei invitert av Høgre, seier Vindenes til Midtsiden.

Men kommunesamanslåing har han ikkje noko imot å snakka om.

– Dette har eg hatt ønskje om lenge. Det er litt skuffande at ikkje Samnanger og Tysnes er med, men samanslåing av Os og Fusa er ein god start. Som ordførar i Fusa fekk eg kjenna på korleis det var å vera ein liten kommune med så mange store oppgåver.

Han ser på seg sjølv som ein av mange borgarlege i Senterpartiet i Hordaland, og har eit godt forhold til Høgre frå før.

– Både i Fusa og elles på Vestlandet har Senterpartiet og Høgre jobba godt saman. Eg har i fleire samanhengar vore imponert over Os Høgre, og eg synest Marie Bruarøy gjorde ein veldig god jobb som ordførar mens Søviknes var vekke.

Før valet i 2019 står han på 17. plass på Bjørnafjorden Høgre si liste.

– Eg reknar ikkje med å gjera ei ny politisk karriere, men eg ser fram til å jobba vidare med Bjørnafjorden Høgre i ny og større kommune.