Hadde eit vanskeleg val
17. mai nærmar seg. I år med ny rute for toget. Måndag hadde juryen ei vanskeleg oppgåve då dei skulle velja teikninga til framsida av programmet.
Bildeserie:
17. maikomiteen inviterer kvart år 5. klassingane på skulane i Os til å koma med teikninger som kan pryda forsida på 17. maiprogrammet.
Måndag var juryen samla hos Loops for å velgje ut årets vinnar. Og dei fekk ei vanskeleg oppgåve.
Blei i godt humør
Heile 148 bidrag var levert inn, mange av dei særs gode. Etter ei første siling sto juryen igjen med 13 teikninger i finalerunden.
– Det var ikkje lett dette, kommenterte Stine Kobbeltvedt og Kjetil Osablod Grønvigh frå kultureininga.
Etter fleire diskusjoner landa dei, saman med Kåre Mongstad frå Loops og underteikna på det endelege valet.
– Ein blir i godt humør av å sjå alle dei flotte teikningane. Vi trur vi har klart å komma fram til ein verdig vinnar, oppsummerte juryen då valet var tatt.
Kven som vann og korleis teikninga ser ut vil ikkje bli offentleggjort før i neste veke. Først må vinnaren bli kontakta.
Har møtt på utfordringar
17. maikomiteen ligg godt i rute med førebuingane til årets nasjonaldag, men nokre utfordringar har dei møtt på vegen.
– I år har vi møtt infrastruktur-utfordringar både på Luranetunet kor dei driv og byggjer på, og i Smiebakken, kor vegen har blitt smalna inn i samband med bygging av ny butikk i Steinneset.
– Vi har funne løysingar i begge tilfella, så det blir 17. mai i år òg, fortel Kobbeltvedt og Grønvigh.
Tilbake i Finnebrekka
Sidan Smiebakken er for smal til at toget kan møte seg sjølv på veg opp og ned, har ein etter ei synfaring bestemt seg for å ta toget tilbake dit det gjekk i starten på 2000-talet, gjennom Finnebrekka.
– Vi startar som i fjor på grusbanen, går opp Landboden og over gamlebrua til Finnebrekka. Ut Finnebrekka til Hatvikvegen kor vi kryssar over og går opp gangstien til Haugsneset, vidare opp til sjukeheimen, kor vi i år går motsatt veg av kva vi pleier. Det gjer vi for at ikkje toget skal måtte kryssa seg sjølv.
– Flaggborgen og korpset vil som vanleg stoppa framfor sjukeheimen og spele for dei som bur og jobbar der.
– Frå sjukeheimen går vi ned Smiebakken til Steinneset før vi går den vanlege ruta over Osbrua gjennom sentrum til Kyrkjeflaten.
– Bilane som vert med i torget, køyrer ned Hatvikvegen når vi kjem dit, rundt Irisen og stiller seg opp for å hekta seg på toget igjen når det passerar i Steinneset, akkurat som vi har gjort dei siste åra, forklarer dei to.
Lyden vil bera
Resten av programmet vil dei to ikkje røpa enno.
– Vi kan lova at det blir gode talarar og eit spennande program på Kyrkjeflaten også i år. I fjor var det eindel som klaga på at lyden ikkje bar godt nok. Det skal vi sørgje for at den gjer i år, forsikrar dei to.